Projektbuxheti 2026-2028 miratohet në KPF, vendimet shkojnë për seancë të jashtëzakonshme

Viti – Nën drejtimin e kryesuesit të Kuvendit Komunal të Vitisë, Bekim Azizi, sot u zhvillua mbledhja e 10-të e rregullt e Komitetit për Politikë dhe Financa (KPF), ku u diskutuan disa prej çështjeve më të rëndësishme buxhetore dhe administrative për komunën.

Kryesuesi Azizi, në hapje të mbledhjes, u uroi mandatin e ri fituesve të zgjedhjeve lokale, përfshirë kryetarin e komunës, Sokol Haliti, si dhe këshilltarët e rinj komunal, duke theksuar nevojën për bashkëpunim dhe angazhim të përbashkët gjatë këtij mandati.

Pika kryesore e rendit të ditës ishte shqyrtimi dhe votimi i propozim-vendimit për projektbuxhetin e Komunës së Vitisë për periudhën 2026-2028.

Dokumenti u prezantua nga drejtoresha e Ekonomisë, Financave dhe Zhvillimit, Milihate Ajeti, ndërsa në emër të ekzekutivit ishte i pranishëm zëvendëskryetari i komunës, Hasan Aliu.

Pas diskutimeve, projektbuxheti u miratua me shumicë votash.

Jashtë rendit të ditës, anëtarët e KPF-së votuan edhe propozim-vendimin për shfuqizimin e Vendimit Nr. 01-110/05-1956 të datës 01.10.2025, që kishte të bënte me miratimin e Planit Ndërkomunal për Menaxhimin e Integruar të Mbeturinave për 12 komuna të rajonit, si dhe Vendimin për Pëlqim Mjedisor Nr. 5496-2/25, të lëshuar nga Ministria e Mjedisit, Planifikimit dhe Infrastrukturës për Vlerësimin Strategjik Mjedisor.

U konfirmua se të gjitha pikat e miratuara do të procedohen për shqyrtim në seancën e jashtëzakonshme të Kuvendit Komunal të Vitisë, e cila do të mbahet më 3 dhjetor 2025, në orën 10:00, në Sallën e Kuvendit Komunal./rajonipress/