Procedurat zbehin gëzimin për rritjen e pensioneve

Pensionistët kosovarë po shprehen se janë lodhur me procedurat që po detyrohen të ndjekin për të dëshmuar kualifikimin e tyre, në bazë të të cilit do t’u caktohet lartësia e pensionit. Sportelet e Universitetit dhe të komunave janë stërngarkuar me pensionistë.

Është hera e dytë në jetë që Nikë Lumezit i është kërkuar diploma e fakultetit. Të parën herë kur ai është punësuar para 46 vjetëve, kur edhe kishte diplomuar në Fakultetin Juridik. Kurse në herën e dytë diploma atij po i kërkohet për të dëshmuar kualifikimin për të qenë përcaktues për pensionin e tij, të përcaktuar sipas nivelit të shkollimit e jo sipas kontributeve.

Lumezi, jurist i diplomuar, të enjten në Komunën e Prishtinës ka nxjerrë certifikatën e lindjes, që është një dokument tjetër, sipas tij, i panevojshëm për të marrë pensionin.

“Po kërkohet edhe diploma dhe noterizimi i diplomës. Përveç noterizimit të diplomës po kërkohet edhe diploma origjinale që këta pastaj ta vërtetojnë, gjë që nuk ka kurrfarë kuptimi pasi diploma kur noterizohet, noteri duhet ta ketë origjinalin, përndryshe nuk e noterizon”, ka thënë Lumezi në një prononcim për “Zërin”.