Privatizimi, krimi më i madh që goditi ekonominë

Ekspertë të ekonomisë, përfaqësues biznesesh dhe deputetë opozitarë njëzëri pajtohen se ekonominë e Kosovës e ka fundosur procesi i deritanishëm i privatizimit, që vlerësohet të ketë qenë një proces klientelist dhe kriminal.

Pushtetarët dhe grupet kriminale, përfituesit e vetëm.

“Fabrikës së Amortizatorëve në Prishtinë i është ndërruar destinacioni duke e shndërruar nga një fabrikë për prodhimin e amortizatorëve të automjeteve dhe autobusëve, që ishte e njohur në tërë Evropën, pas privatizimit aty në hapësirat e saj prej dhjetëra hektarëve u ndërtuan, një Terminal Doganor dhe një studio e një TV-je, kurse nga ajo për çfarë është privatizuar me synimin që të vazhdojë të punojë e të prodhojë në fushën për çfarë ka qenë në prodhimin e amortizatorëve për fat të keq nuk është bërë asgjë”, u shpre deputeti Faton Topalli

Ekspertë të ekonomisë, përfaqësues biznesesh dhe deputetë opozitarë njëzëri pajtohen se ekonominë e Kosovës e ka fundosur procesi i deritanishëm i privatizimit, që vlerësohet të ketë qenë një proces klientelist dhe kriminal. Vlerësohet se shumë asete të privatizuara nuk ranë në duart e biznesmenëve të konsoliduar, por ato mbërritën në duart e mafio-oligarkëve, të cilët nuk kishin si qëllim zhvillimin e ekonomisë hap pas hapi, por përfitimin e shpejtë dhe për interesa të tyre. Opozita dhe përfaqësuesit e bizneseve vlerësojnë se në këtë privatizim ka gisht politika e pushtetarët, të cilët i joshën kompanitë e lidhur me ta për të blerë asetet publike e shoqërore me çmime të ulëta, disa nga të cilat u shitën e u stërshitën. I këtij mendimi është njohësi i kësaj fushe, Suat Berisha (nënkryetar i AKB-së). Ai tha se rrjedha e deritanishme e procesit të privatizimit në Kosovë e ka dëshmuar të kundërtën e qëllimit të tij. “Në vend se procesi i privatizimit të ndikonte në rritjen e numrit të të punësuarve, procesi i tij e ka dëshmuar të kundërtën, sepse ka prodhuar papunësi shumë të madhe, pasi një pjesë e madhe e mijëra punëtorëve NSH-ve dhe NPve, që janë privatizuar, kanë mbetur pa punë dhe kjo është e patolerueshme”, theksoi Berisha.

Politikanët përfituan nga procesi Deputeti i Kuvendit të Kosovës nga opozita, Faton Topalli, tha se përfundimi i luftës e ka gjetur Kosovën e çliruar, me një infrastrukturë të caktuar dhe me një pjesë të fabrikave, që nuk ishin të shkatërruara dhe që ishin pronë e qytetarëve të Kosovës. “Por, për fat të keq përmes procesit të privatizimit e gjitha pasuria, që e krijoi Kosova që nga përfundimi i Luftës së Dytë Botërore e deri më 1999, ka kaluar nga pasuria shoqërore tek një pasuri e grupeve të caktuara, që janë individë apo sipërmarrës ekonomikë, të cilët këtë pasuri e kanë marrë me një çmim jashtëzakonisht të ulët, duke u pasuruar për vete shumë dhe brenda natës, ndërkohë që shumica e qytetarëve të Kosovës kanë mbetur pa para”, theksoi ai. “Duke manipuluar çmimet e privatizimit edhe 20-përqindëshi që u takon punëtorëve ka qenë shumë i ultë, sepse pronat janë shitur me çmime shumë të ulëta dhe vlera e 20- përqindëshit është shumë e vogël”, u shpreh më tej deputeti Topalli.

Sipas tij, ka pasur raste që privatizimi ka shkuar mirë, por në shumicën e rasteve procesi i privatizimit nuk ka shkuar si duhet. “Dihet publikisht që politika ka luajtur një rol shumë të madh në procesin e privatizimit në Kosovë, njerëzit e politikës kanë përfituar nga ky privatizim dhe si i tillë nga ky privatizim kanë përfituar vetëm një pjesë e atyre njerëzve, që kanë manipuluar me atë privatizim”, potencoi ai. /kosova sot/