Prioriteti kryesor i Thaçit, diplomacia ekonomike

Zëvendëskryeministri i Kosovës dhe njëherit Ministri i Punëve të Jashtme Hashim Thaçi, ka thënë se prioriteti i tij i ri kryesor do të jetë diplomacia ekonomike.
Këtë deklaratë, Thaçi e ka bërë gjatë vizitës në Tiranë, ku ka marrë pjesë në një forum me opinionistë dhe studiues në Shqipëri, i organizuar nga Instituti për Studime Ndërkombëtare.

Siç lajmëron vetë Thaçi, përmes një publikimi në rrjetin social Facebook, në këtë takim ai ka folur edhe për dialogun me Serbinë, njohjet ndërkombëtare, integrimi evropian etj.

“Me të pranishmit diskutuam mbi zhvillimet më të fundit në Kosovë si dhe sfidat që e presin vendin në politikën e brendshme dhe të jashtme. Gjatë bisedës u tregova se përveç vijimit me prioritetet tradicionale të politikës sonë të jashtme sikurse janë Integrimi Euro-Atlantik, dialogu me Serbinë, njohjet ndërkombëtare, diplomacia publike prioriteti i ri kryesor imi do të jetë diplomacia ekonomike. Kjo do të synojë që ta vendosë politikën e jashtme në shërbim të mirëqenies ekonomike të qytetarëve për të nxitur zhvillimin ekonomik dhe hapjen e vendeve të reja të punës”, ka shkruar Thaçi në Facebook./Telegrafi/