„Primano schritt: weise“, program në gjuhën shqipe për fëmijët dhe prindërit e tyre

“Primano schritt: weise” është një program lojërash dhe mësimi, i cili u dedikohet familjeve me fëmijë të vegjël në kushte të vështira socio-ekonomike.

Ky program organizohet nga qyteti i Bernës që nga viti 2007 dhe që nga ajo kohë ofrohet edhe në gjuhën shqipe.

Që nga maji i vitit të kaluar në pjesën verilindore të qytetit të Bernës është angazhuar Teuta Kryeziu. Ajo viziton në shtëpitë e tyre familjet shqiptare, të cilat kanë fëmijë të vegjël.

Pedagogia shqiptare prezanton programin e lojërave dhe mësimit në gjuhën gjermane dhe në gjuhën shqipe.

“Të edukosh një fëmijë duhet të angazhohet i tërë fshati”, kjo është një thënie e vjetër, që jo rastësisht përputhet me programin tonë, thotë për albinfo.ch Kryeziu.

Pasi që tema rreth edukimit të fëmijëve është temë shumë komplekse, mbështetja nga ndonjë institucion është më se i mirëseardhur për prindër.

Se sa janë të informuar prindërit shqiptarë për këtë program nga pjesëmarrja e tyre, mund të gjykohet se nuk janë në nivel.

“Prindërit të cilët kanë bërë hapin e parë dhe janë informuar detajisht në lidhje me konceptin dhe rëndësinë e këtij programi janë shumë falënderues dhe e çmojnë shumë faktin që për një orë në shoqëri me ne luajnë dhe i mësojnë fëmijët e tyre me materialin e lojërave dhe idetë që ne ua sjellim”, thotë në këtë bashkëbisedim Kryeziu.

Sipas Kryeziut, ata janë shumë të lumtur që edhe përkundër faktit që janë në një shtet të huaj, u jepet mundësia që fëmijët e tyre përmes lojës të mësojnë në gjuhën e tyre amtare.

Gjithashtu, vlen të ceket se këta fëmijë socializohen në shoqëri me fëmijët e tjerë, falë kontaktit në takimet grupore që i organizojmë çdo të dytën javë, me ç´rast përfitojnë edhe nga komunikimi në gjuhën gjermane.

“Përmes lojërave të ndryshme dhe përrallave zgjerohet dhe pasurohet fjalori i tyre në të dy gjuhët: shqip dhe gjermanisht”, thotë më tutje Kryeziu.

Duke përfituar nga kjo përvojë, këta prindër janë edhe më të sigurt sa i përket të ardhmes së fëmijëve të tyre në sistemin parashkollor këtu në Zvicër.

“Një nga prioritetet e punës sonë është t´i motivojmë prindërit të jenë më të guximshëm në rrugën e tyre rreth edukimit dhe arsimimit të fëmijëve të tyre”, bën të ditur Kryeziu, duke u bërë thirrje prindërve që të jenë më të hapur dhe të informohen me kohë, se çka është me rëndësi për ta si prindër, që fëmija e tyre të ketë mundësi të zhvillohet i barabart me fëmijët e tjerë.

“Në bashkëpunim me koordinatoren, ne u ofrojmë ndihmë familjeve që janë pjesë e programit “primano schritt. weise”, nëse ata kanë nevojë që fëmijët e tyre të gjejnë një vend të lirë në çerdhe (Kita), lojëra për fëmijë (Spielgruppe), si dhe për nënat e reja që kanë ardhur kohët e fundit nga Kosova u ndihmojmë të gjejnë kurse të gjuhës gjermane (Muki-Deutsch Kurse)”, tha Teuta Kryeziu.

Programi në fjalë është një urë lidhëse mes familjeve dhe institucioneve në lagjen ku ata jetojnë.

Nëse jetoni në qytetin e Bernës, kontaktoni me “Primano schritt: weise” dhe aty mund të informoheni më detajisht rreth kësaj oferte, sipas kërkesës edhe në gjuhën shqipe.

Personi kontaktues në gjuhën shqipe: Teuta Kryeziu, tel: 031 321 69 52, 077 489 97 72../albinfo/