Preteni: AKK e ka parandaluar korrupsionin në Kosovë

Ish-shefi i Agjencisë Kundër Korrupsionit, Hasan Preteni, ka vlerësuar se kjo agjenci ka pasur sukses në parandalimin e korrupsionit në Kosovë. Por, sa i përket luftimit të kësaj dukurie, ai ka thënë se mbetet shumë për të dëshiruar.

Preteni ka thënë në një intervistë për “Epoka e re” se AKK është vetëm hallka e parë në zinxhirin e mekanizmave antikorrupsion.

Ai ka thënë se për dy mandate sa e ka drejtuar AKK’në, kjo agjenci ka bërë punë të pavarur dhe asnjëherë, sipas Pretenit, nuk është akuzuar për afërsi me pushtetin.

“Agjencia Kundër Korrupsionit është një institucion model në Kosovë, duke qenë e pavarur dhe e papolitizuar. Asnjë zyrtar nuk është pjesë e familjeve të liderëve partiakë dhe nuk ka familjarizim”, është shprehur ai.

Preteni ka bërë të ditur se pas largimit nga kreu i AKK’së, aktualisht është i papunë.