Presin protestë masive edhe pa ‘Vetëvendosjen’

Tashmë edhe zyrtarisht tri partitë opozitare, Lëvizja “Vetëvendosje”, Aleanca për Ardhmërinë e Kosovës dhe “Nisma për Kosovën”, kanë ndarë rrugët. Por kjo nuk po ndalon AAK-në dhe “Nismën” që më 14 maj të organizojnë protestë gjithëpopullore kundër Qeverisë me kërkesën për dorëheqjen e saj dhe shkuarjen në zgjedhje.

Këto dy parti, madje thonë se protesta do të jetë masive pavarësisht se Lëvizja “Vetëvendosje” e ka konfirmuar se nuk do të jetë as organizatore e as pjesëmarrëse në protestën e 14 majit. Zyrtarë të AAK-së dhe të “Nismës për Kosovën” theksojnë se ata janë vazhdimisht në terren dhe në kontakt me qytetarët për protestën e 14 majit, duke thënë se “Vetëvendosja” nuk mund të ndikojë tek qytetarët për të mos dalë në protestë. Megjithatë, pranojnë se ndikimi i saj mund të jetë vetëm tek elektorati i saj.

Deputetja e AAK-së, Time Kadrijaj, thotë për gazetën “Zëri” se protesta është paralajmëruar dhe do të mbahet më 14 maj dhe se çdo ditë janë në terren, në kontakt me struktura duke u mobilizuar. Ajo thekson se ish-partneri i tyre në opozitën e bashkuar, “Vetëvendosja”, nuk mund të ndikojë që protesta të mos jetë masive.
“Prapë do të jetë një protestë gjithëpopullore dhe ftojmë qytetarët që të dalin në protestë dhe kemi shumë arsye për të protestuar kundër kësaj Qeverie. ‘Vetëvendosja’ mund të ndikojë tek elektorati i vet, por tek qytetarët që nuk janë pjesë e partive politike jo, sepse qytetarët kanë pse të protestojnë kundër kësaj Qeverie të keqe”, ka thënë deputetja Kadrijaj./kosova sot/