Presidentja u bën thirrje liderëve: Duhet të dialogoni pa kushte, e jo ta rrënoni Shtetin

Presidentja e Kosovës, Atifete Jahjaga, u ka bërë thirrje liderëve të partive politike të ulën dhe të bëjnë dialog e jo të rrënojnë e sfidojnë shtetin e Kosovës.Këtë thirrje Presidentja e ka bërë në Konferencën e Prokurorëve duke thënë se rruga e Kosovës drejt BE’së kërkon punë, konsensus e dialog.

“Por mbi të gjitha kërkon dialog dhe marrëveshje. Dialog të brendshëm për të zgjidhur çështjet që nxisin mosmarrëveshje. Dialog pa paragjykime, ndërmjet njerëzve që dikur kanë qëndruar së bashku për ta bërë luftën dhe që sot duhet ta ruajnë paqen. Pra na duhet që të gjithë së bashku të ulemi dhe të gjejmë zgjidhje, sepse shtetin nuk mund ta sfidojmë për çdo ditë dhe sepse nuk mund të rrënojmë institucionet e vendit, besimin tek të cilat duhet me shumë mund ta rikthejmë tek qytetarët”, ka thënë ai.

“Por kjo rrugë kërkon nga ne më shumë përkushtim dhe më shumë punë. Kërkon institucione të forta dhe demokratike; kërkon më shumë rend dhe ligj; respektim të institucioneve të drejtësisë; më shumë angazhim për të ruajtur vlerat e diversitetit të shoqërisë, edhe atë etnik, edhe kulturor edhe fetar”, ka shtuar ajo. /Gazeta Express/