Presidentja Osmani: Zhdukja me dhunë e mijëra qytetarëve tanë ishte përpjekje e qartë për zhdukjen e një populli
RajoniPress
11:02, 27 Prill, 2023
Presidentja e Republikës së Kosovës, Vjosa Osmani Sadriu, me rastin e 27 prillit, ditës së të zhdukurve me dhunë në luftën e fundit në Kosovë, ka thënë se zhdukja me dhunë e mbi mijëra qytetarëve tanë, përfshirë edhe shumë fëmijë ishte përpjekje e qartë për zhdukjen e një populli.
Osmani shkruan se kjo është një ndër krimet më të llahtarshme të regjimit gjenocidal të Millosheviqit.
“Si çdo ditë, por veçanërisht sot, kujtojmë mbi 1600 bashkëqytetarët tanë të zhdukur me dhunë në luftën e fundit në Kosovë. Sot mendjen e kemi te familjarët e tyre dhe solidarizohemi me dhimbjen e ankthin e tyre të çdoditshëm.
Zhdukja me dhunë e mbi mijëra qytetarëve tanë, përfshi shumë fëmijë ishte përpjekje e qartë për zhdukjen e një populli.
Kjo është një ndër krimet më të llahtarshme të regjimit gjenocidal të Millosheviqit. Në ditët si kjo duhet ta kuptojmë jo vetëm se sa e rëndësishme është që të kërkohet kthimi i të gjithë të zhdukurve me dhunë, por mbi të gjitha se sa e rëndësishme është që ta vëmë në vend drejtësinë për ta”, shkruan e para e shtetit. /Telegrafi/
