Presidentja kërkon kompromis nga liderët e partive

Presidentja e Kosovës, Atifete Jahjaga, ka kërkuar kompromis nga liderët e partive politike për t’i ndërtuar institucionet e Kosovës.

Nëpërmjet një përgjigje me shkrim të Zëdhënësi i Presidentes Jahjaga, Arbër Vllahiu ka kërkuar dialog mes partive politike për të gjetur zgjidhje për tejkalimin e bllokadës politike.

“Procesi i stërzgjatur i ndërtimit të institucioneve po vazhdon ta pengojë funksionimin e shtetit dhe ka pamundësuar konsolidimin ndërkombëtar të tij. Është koha e fundit që liderët politikë të shohin përtej interesave të tyre dhe të tejkalojnë çdo pengesë për të ndërtuar Institucione të qëndrueshme dhe përfshirëse, bazuar në kuadrin kushtetues dhe në parimet e përcaktuara që respektojnë rendin kushtetues të vendit dhe obligimet ndërkombëtare të tij. Presidentja vazhdon të kërkojë nga liderët politikë që ta kuptojnë seriozitetin e situatës dhe të reflektojnë duke i ofruar njëri tjetrit mundësinë e dialogimit e përmes kompromisit për qytetarët e Kosovës, ta nxjerrin vendin nga kjo gjendje amullie”, thuhet në përgjigjen e Vllahiut, për Express.