Presidenti Thaçi: Askush nuk mund ta rishkruajë historinë e Kosovës

Pasi Specialja ka ngritur aktakuzë kundër presidentit Hashim Thaçi, ky i fundit ka reaguar në rrjetet sociale, duke thënë se askush nuk mund ta rishkruajë historinë e Kosovës.

Ai po ashtu të enjten ka vendosur në kopertinën e Facebook-ut të tij si dhe në Instagram fotografinë me emblemën e Ushtrisë Çlirimtare të Kosovës, transmeton Telegrafi.

Ndryshe, Specialja ka ngritur aktakuzë ndaj presidentit, Hashim Thaçi dhe kryetarit të Partisë Demokratike të Kosovës, Kadri Veseli. Pas kësaj, presidenti Thaçi dhe kryeministri Hoti kanë anuluar vizitën në Washington, ku pritej të rifillonte dialogu me Serbinë.

Zyra e Prokurorit të Specializuar, ka njoftuar se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. /Telegrafi/