Presidenti Levits: Letonia e mbështetë anëtarësimin e Kosovës në Këshillin e Evropës dhe në organizatat tjera ndërkombëtare

Presidenti i Letonisë, Egils Levits në një konferencë për media pas takimit me presidenten e vendit, Vjosa Osmani theksoi se shteti i tij i kupton aspiratat e Kosovës që të jetë shtet paqësor e demokratike, ndërsa shprehu mbështetjen e shtetit të tij për anëtarësimin në organizata ndërkombëtare dhe për liberalizimin e vizave.

Ai para mediave në Kosovë tha se Letonia dhe Kosova nuk kanë ndonjë armik, por se “vetëm jemi duke mbrojtur demokracinë tonë, pavarësinë tonë”.

Levits rikujtoi se Letonia është ndër shtetet e para që e njohën pavarësinë e Kosovës dhe i kuptojnë aspiratat e Kosovës që të jetë shtet paqësor e demokratik.

Ai foli edhe për bashkëpunimin e Kosovës me NATO-n, ndërsa tha se është e domosdoshme që Kosova t’i bashkohet Partneritetit për Paqe.

“Së paku është e domosdoshme që Kosova t’i bashkohet Partneritetit për Paqe ne mendojë se tani është koha e duhur por varet nga NATO… Është shumë me rëndësi të fuqizohet bashkëpunimi… letonia e përkrah këtë hap”, tha ai, raporton Telegrafi.

Levits shprehu mbështetje të plotë edhe për integrimin e Kosovës në organizata ndërkombëtare, si në Këshill të Evropës e në forume tjera.

“Ne do të mirëpritnim aplikimin e Kosovës në Këshillin e Evropës, prandaj ne mund të shkëmbejmë përvojat tona për të gjetur rrugën drejt anëtarësimit. Unë do ta mirëpres Kosovën si anëtare e Këshillit të Evropës”, tha ai.

Presidenti i Letonisë po ashtu ofroi mbështetjen e shtetit të tij për liberalizimit të vizave.

“Tani nuk ka më pengesa të arsyeshme që të mos jepet liberalizimi i vizave dhe ne e mbështesim Kosovën. Ne mbështesim progresin në luftimin e korrupsionit, duke zbatuar masa të ndryshme të zbatimit të ligjit… Kemi vërejtur që viti i kaluar ishte i suksesshëm në këtë drejtim”, tha Levits.

Ai foli edhe për dialogun Kosovë-Serbi, për të cilin tha se vëren që ka probleme, por shprehu besimin se bisedimet do të vazhdojnë. /Telegrafi/