Presheva bëhet me galeri arti

120 punimet me peizazhe, portrete, natyrë, grafika, vizatime dhe cikle abstrakte ishin të ekspozuara në galerinë private të hapur në rrugën “Qemal Shehu” numër 55 në Preshevë. Kjo galeri, e hapur para disa ditësh, është e para e këtij lloji në Preshevë. “Art Gallery” quhet galeria e hapur nga studentja e Fakultetit të Arteve në Universitetin “Hasan Prishtina” Fitore Fejzullahu.

Kanë qenë punimet e saj që janë ekspozuar në këtë galeri e të cilat kanë ngjallur interesim të madh tek dashamirët e artit, profesorë, kolegë e miq të piktores preshevare.

Fitorja tha se ka menduar ta hapë në Preshevë, sepse këtu nuk ka asnjë galeri tjetër e as nuk ka pasur ndonjëherë. “Kam menduar t’i ngre njerëzit pak në këtë drejtim. Me pasë më shumë njohuri rreth artit, me pa art. Me pasë ekspozita më shumë. Gjithashtu kjo hapje e galerisë i bën njerëzit t’i tërheqë t’i shohin punimet, ta vlerësojnë artin, të jenë në rrjedha të artit”, tha piktorja e re (Tribuna).