Premtohet angazhim në luftimin e ekonomisë joformale

Këshilli konsultativ i krijuar mes Doganës, Administratës Tatimore dhe përfaqësuesve të bizneseve, gjatë vitit 2014 pritet të fokusohet në luftimin e ekonomisë joformale. Për këtë, është duke u përgatitur një plan veprimi, që pritet të shndërrohet në strategji tre-vjeçare. Kështu u tha pas takimit të parë të këtij këshilli në Prishtinë.

Luftimi i ekonomisë joformale, që vlerësohet se po dëmton rëndë ekonominë e Kosovës, pritet të trajtohet më seriozisht gjatë vitit të ardhshëm.

Ministri i Financave, Besim Beqaj tha se për këtë do të punojnë bashkërisht me bizneset, me të cilat do të mbajnë takime mujore, për të diskutuar edhe për nismat dhe ligjet e reja në favor të ekonomisë. “Ne së bashku me biznesin jemi duke përgatitur një plan veprimi, i cili do të duhej të shndërrohen në strategji e cila duhet të jetë për tri vitet e ardhshme për trajtimin e ekonomisë joformale”, theksoi Beqaj.

Ministri tha se gjendja makrofiskale e vendit vazhdon të jetë e qëndrueshme. Ndonëse të hyrat doganore janë më të ulëta sesa planifikimi, ai sqaroi se kanë shënuar rritje të hyrat e brendshme për rreth 10 për qind krahasuar me vitin e kaluar, apo 1 për qind krahasuar me planin, që tregon për rritjen e aktivitetit ekonomik brenda vendit.

Kryesues i këshillit me mandat njëvjeçar u zgjodh kryetari i Aleancës së Bizneseve, Agim Shahini, i cili theksoi se bashkërisht do të angazhohen në shumë sfera. “Informaliteti është njëra nga pikat e ardhshme që së bashku mendojmë ta luftojmë bashkërisht dhe mendoj që ky këshill do të japë rezultate, tha ai.

Kryetari i Odës Ekonomike Amerikane në Kosovë (OEAK), Arian Zeka, tha se bizneset taksapaguese të rregullta e konsiderojnë mjaft shqetësuese mungesën e përpjekjeve të harmonizuara për luftimin e kësaj dukurie.

Megjithëse nuk ka të dhëna të sakta, sipas të dhënave të organizatave financiare ndërkombëtare, ekonomia joformale në Kosovë vlerësohet se është rreth 30 deri në 40 për qind. /Telegrafi/