Prej vitit 2006 presin asfaltimin e rrugës e gjatë 160 metra, të gjitha pushtetet i kanë gënjyer
RajoniPress
06:55, 23 Maj, 2023
Gjilan – Emrush Limani është banor në rrugën “Idriz Seferi” mbrapa “Florimi Center” në Gjilan dhe që nga viti 2006 thotë se ka bredhur poshtë e lartë duke takuar kryetar e zyrtar komunal po deri më tani thotë se vetëm premtime ka marrë sepse rruga kurrë nuk është shtruar. I bëjë apel Alban Hysenit dhe drejtorisë së shërbimeve publike që mos ta dënojnë këtë pjesë të qytetit sepse vetëm rruga jonë ka mbetur nën mëshirën e zotit thotë Emrushi.
Emrush Limani ka qindra arsye të jetë i revoltuar në pushtetin komunal sepse që nga viti 2006 ende nuk ka arritur ta realizojë kërkesën, që e kanë bërë 10 familje për asfaltimin e rrugës 160 metra e gjatë.
“Nëse nuk je dajë, baxhanak a biznesmen i fortë që kanë lidhje me kryetarin e komunës kurrë nuk mundesh me krye punë. Nga viti 2006 e kam takuar Xhemajl Hysenin, Qemajl Mustafën, Lutfi Hazirin dhe kam marrë vetëm premtime. Alban Hyseni nuk po më pret fare në takim dhe nuk e kuptojë çfarë tipi është ai, kur qytetarët kanë halle e telashe praktike” shprehet Emrushi për rajonipress.
Emrush Limani thotë se vetëm rruga e tyre është anashkaluar. “Në kohën e Lutës erdhën makineritë afër neve dhe ikën në drejtim të atyre që kishin të holla dhe që kishin ndikim tek drejtorët e Lutës. Një rrugë më naltë u asfaltua sepse e kishte shpinën e fort e ne mbetëm sërish. Vërtet është bërë boll me këto lojëra të pushtetit lokal. Edhe ne jemi pjesë e qytetit të Gjilanit dhe kërkojë nga kreu i komunës që ta marr seriozisht kërkesën tonë” tha Limani.
Janë mbi 10 familje që vazhdojnë të bredhin korridoreve të komunës për të kërkuar zgjidhje për rrugën e cila ende është e paasfaltuar.
Ndryshe Emrush Limani i ka të ruajtura të gjitha shkresat dërguar zyrtarëve komunal dhe ankesat e shumta që ua ka dërguar pushtetarëve.
Ndërsa nga drejtoria e shërbimeve publike thanë për rajonipress se rruga e banorëve tek “Idriz Seferi” është hyrë në planifikimin e komunës dhe besojmë se këtë verë përfundon asfaltimi./rajonipress/
