Portieri Aridon Bllaca shkëlqen, Gjilani fiton një pikë në Suharekë

Gjilani dhe Ballkani janë ndarë në paqe, në ndeshjen e xhiros së 22-të në Superligën e Kosovës në futboll. Ndeshja e zhvilluar në stadiumin e qytetit në Suharekë përfundoj me rezultat 1:1. Kampioni në fuqi, Ballkani, kaloi e para në epërsi.

Mamadou Danfa në minutën e 18-të të ndeshjes depërtoi nga krahu i majtë dhe harkoi zhargas. Topi shkoi te Vesel Limaj që ndali topin për kapitenin Edvin Kuç, i cili me gjuajtje të saktë realizoi për 1:0.

Gjilani arriti të barazoi rezultatin në fund të pjesës së pare.

Portieri vendas Damir Luljanoviq e ndali në mënyrë të palejuar, Oltion Bilallin e Gjilanit, ndërsa gjyqtari kryesor, Ilir Mehmeti, dha penallti për mysafirët, për të cilën protestuan shumë vendësit dhe tifozët e Ballkanit.

Nga pika e bardhë i saktë ishte Elvedin Heriq, që shënoi në minutën e parë të shtesës në pjesën e parë për 1:1.

Më meritori për pikën e fituar në Suharekë, ishte Aridon Bllaca, që bëri pritje fantastike veçanërisht në fund të ndeshjes. Gjilani me këtë barazim mbetet në pozitën e tetë me 22 pikë.