Politikë e qërimit të hesapeve personale

Ashpërsohet gjuha e komunikimit ndërmjet liderëve

“Nëse opozita e zgjeron kauzën e saj në protestat e 26 marsit, do të kishte një protestë gjithëpopullore dhe, pa dyshim, ky pushtet kriminal do të dridhej dhe reflektimi do të ndodhte. Opozita duhet ta ketë parasysh edhe një gjë – se zgjedhjet mund t’i fitojë vetëm nëse bëhen të gjitha partitë opozitare bashkë”, shprehet analisti Faik Krasniqi

Për fundin e kësaj jave, më 26 mars, është duke u përgatitur një protesta e tretë masive e opozitës së bashkuar, me kërkesat tanimë të njohura – zgjedhjet e jashtëzakonshme dhe anulimin përfundimtar të zbatimit të marrëveshjeve për Asociacionin e komunave me shumicë serbe dhe Demarkacionin e kufirit me Malin e Zi.

Derisa koalicioni qeverisës është këmbëngulës në kundërshtimin e të gjitha këtyre kërkesave, përkrahja e qytetarëve në këto kërkesa të opozitës po vazhdon të shtohet, gjuha e komunikimit pozitë-opozitë po ashpërsohet, prandaj analistët politikë presin që protesta e radhës të jetë vërejtja e fundit qytetare kundër kësaj klase politike në pushtet, që të reflektojë dhe të gjendet një mjet i pranueshëm i kompromisit politik për shpëtimin e vendit nga një krizë tjetër politike, që mund të jetë me rrezik edhe për sigurinë e vendit.

Ekziston një bindje shumë e madhe, te njohësit e këtyre zhvillimeve, se përveç çështjeve që po kundërshtohen nga opozita, një mllef i mbledhur ndaj partive politike në pushtet është ikja e LDK-së në krye me Isa Mustafën, i cili papritmas iu bashkua PDK-së dhe siguruan votat e mjaftueshme edhe për votimin e Gjykatës Speciale.

Tani opozita e bashkuar, sipas analistëve politikë, synon që me një “plumb” të vrasë dy zogj, që duke rrëzuar Qeverinë e Kosovës, përmes protestave popullore, të pamundësojë themeliminrespektivisht funksionimin operacional të Gjykatës Speciale dhe të bllokohen edhe marrëveshjet e 25 gushtit të vitit 2014. “Ashpërsimi i raporteve po vjen duke u intensifikuar, diçka e madhe është duke u zier në skenën politike në vend. Në anën tjetër, Gjykata Speciale po themelohet e një veprim tjetër pritet në koordinim me EULEX-in, si strategji ndërkombëtare për të larguar njerëzit që janë mbi rendin e ligjin nga skena politike dhe institucionale. Kjo gjithsesi është një krizë artificiale e pandashme dhe po tregon një lloj mosbindjeje totale ndaj çfarëdo veprimi institucional dhe zgjidhjes me dialog. Por, me këtë mund të nënkuptohet se diçka e keqe mund të ndodhë”, thotë Blerim Burjani për “Kosova Sot”.

Ai ka pohuar se kjo sjellje e papërgjegjshme ndaj shtetit dhe qytetarëve nuk është duke u reflektuar tash e 7 muaj, por në mënyrë retroaktive është e tillë tash e gati dy vjet të plotë. “Është duke vazhduar kjo krizë e çuditshme, krizë që po vazhdon të preokupojë shtetin. Ata të opozitës duan zgjedhje, por nuk tregojnë çka, nëse i humbin zgjedhjet, a do të jenë ata në pozitë akoma më të keqe sasa kur i kanë humbur ato në vitin 2014. Duhet ta dimë se a do të vazhdojnë këta me këtë formë kundërshtimi, a do të thotë se do të vazhdojmë të mbajmë zgjedhje sipas dëshirës derisa të vijnë në pushtet. Këtë e shoh si një dëm të madh për shtetin, sepse duket që këta njerëz, shumica prej tyre, nuk kanë kurrfarë profesioni tjetër dhe politikën po e shohin si të vetmin biznes”, shprehet Burjani./kosova sot/