Politikanët e shantazhuar ia hapën Serbisë derën për në BE

Dialogu Prishtinë-Beograd solli autonominë serbe brenda Kosovës. Berisha: Dialogu po e degjeneron Republikën

“Qeveria e Kosovës në kundërshtim me parimin themelor të së drejtës ndërkombëtare publike – reciprocitetin, gjatë negociatave bilaterale kosovaro-serbe, në disfavorin e vendit tonë pranoi me inferioritet dhe zhvilloi bisedime në kushtet virtualisht të diktuara nga pala serbe, me premisën se shteti serb Kosovën e trajton pjesë integrale të veten, dhe se Republikën e Kosovës nuk e pranon për shtet”, thotë eksperti Riza Smaka

Dialogu rreth 4-vjeçar, i filluar me ndërmjetësimin e BE-së në mes të Prishtinës dhe Beogradit në Bruksel, dhe rezultatet e fundit të kurorëzuara më 25 gusht të këtij viti, vetëm sa kanë argumentuar shqetësimin e hershëm të ngritur nga njohës të rrethanave politike, se nga ky dialog përfituese do të dalë vetëm pala serbe. De fakto dialogu me Serbinë u imponua vetëm për t’ia lehtësuar rrugën e integrimeve të këtij shteti në BE, sikur edhe për t’i mundë- suar këtij shteti që të ketë ndikimin e vet dominant në zhvillimet brenda Kosovës, duke e rehatuar sipas interesit të vet shtetëror edhe pakicën serbe, madje jo vetëm në veri. Kjo mundësohet me krijimin e Asociacionit të komunave me shumicë serbe, duke ia bashkangjitur atyre edhe të gjitha komunat e tjera, pra ato enklavat me shumicë serbe me një “hartë leopardi”, duke i ngritur ata përtej nivelit të komunave me emërtimin “Bashkësia e komunave me shumice serbe, si një “mini shtet” në shtetin e vogël të Kosovës./kosova sot/