Politika e inkriminuar e ushqen korrupsionin në drejtësi

Emërimet e deritanishme në baza të politikës ditore të një pjese të njerëzve në sistemin e drejtësisë kanë qenë dukuri në Kosovën e pasluftës, por pas ofrimit të MSA-së dhe pritjes së liberalizimit të vizave mund të ketë zhvillime të reja.

Deputeti nga radhët e koalicionit në pushtet, nga LDK-ja, Adem Salihaj, në një prononcim për gazetën “Kosova Sot”, ka thënë se sistemin e krijon sistemi politik i shtetit. Kësisoj, sipas tij, përderisa sistemi politik i shtetit është i korruptuar dhe i inkriminuar, asnjë organ tjetër i shtetit nuk mund të jetë i pastër dhe nuk mund të vendosë sundimin e ligjit, shkruan gazeta Kosova Sot.

Emërimet e deritanishme në baza të politikës ditore të një pjese të njerëzve në sistemin e drejtësisë kanë qenë dukuri në Kosovën e pasluftës, por pas ofrimit të MSA-së dhe pritjes së liberalizimit të vizave mund të ketë zhvillime të reja.

Nevojën e eliminimit të emërimeve politike në drejtësi e ka përmendur edhe komisioneri Evropian për Politika të Fqinjësisë dhe Zgjerimit, Johannes Hahn, në një konferencë për medie të martën, i cili, pos tjerash, ka deklaruar se nuk duhet pasur politizime në emërimet që bëhen në sistemin e drejtësisë. Veç kësaj, shtrohet edhe pyetja se pse Parlamenti i Kosovës asnjëherë nuk ka debatuar seriozisht për problemet që ka drejtësia kosovare. Pavarësisht asaj se pushtetet janë të ndara, përfaqësuesve të popullit u takon që të debatojnë për sistemin e drejtësisë, i cili mund të thuhet se është lërë shumë anash dhe gjendet në një gjendje të rëndë. Për këtë çështje, si dhe për komentet e komisionerit Hahn, flasin njohësit e kësaj fushe. Deputeti nga radhët e koalicionit në pushtet, nga LDK-ja, Adem Salihaj, në një prononcim për gazetën “Kosova Sot”, ka thënë se sistemin e drejtësisë e krijon sistemi politik i shtetit. Kësisoj, sipas tij, përderisa sistemi politik i shtetit është i korruptuar dhe i inkriminuar, asnjë organ tjetër i shtetit nuk mund të jetë i pastër dhe nuk mund të vendosë sundimin e ligjit. “Mendoj se të gjithë ndërkombëtarët janë shumë të vetëdijshëm për këtë situatë, madje janë vetë shkaktarët kryesorë të kësaj gjendjeje në Kosovë. Deklarimet e ndërkombëtarëve janë në stilin hajt t’i kërkojmë gjurmët e korrupsionit dhe të kriminelëve e të bandave, në kohën kur bandat dhe kriminelët janë këmbëkryq në organet më të larta të shtetit dhe që ne i kemi vazhdimisht para syve tanë”, është shprehur deputeti Adem Salihaj.

Sistemi gjyqësor duhet të pavarësohet

Eksperti i së drejtës, Muhamet Kelmendi, tha se me sistemin aktual të drejtësisë është e pamundur që të realizohet pikësynimi, të cilin e kërkoi komisioneri Hahn të martën, lidhur me atë që të kemi shtet ligjor. “Pra, mënyra e emërtimit vjen kryesisht nëpërmes subjekteve politike që janë në pushtet dhe tani është e pamundur që ne të kemi një sistem gjyqësor dhe prokurorial që do të jetë i pavarur nga sistemi politik, nga partitë politike e kam fjalën dhe nga ana tjetër nga shteti, i cili del nga pozita që është në pushtet. Pra, duhet një reformim i tërësishëm i sistemit gjyqësor, me këtë kuptoj reformimin e Prokurorisë, atë të Gjyqësorit dhe të Këshillit gjyqësor dhe prokurorial të Kosovës, i cili duhet të shkojë në tërësi të pavarësohet nga politika, t’i jepen kompetenca të gjëra të tilla dhe të konkurrohet mbi bazën e kualiteteve, përgatitjeve shkollore, të dhënave morale, etike dhe të fakteve të tjera, ku natyrisht mbi bazën e tillë pastaj të përcaktohen gjyqtarët dhe jo mbi bazën e përkatësisë politike dhe natyrisht qeveritare”, theksoi ai. Më tej në këtë drejtim Kelmendi mendon se edhe deklarata e komisionerit Hahn për këtë çështje e ka pasur këtë qëllim e ka pasur sikurse që thotë ai, që Shqipërisë që ia ka paraqitur si kusht reformën e sistemit gjyqësor në tërësi, se kjo e fundit duhet të pavarësohet nga shteti, e po ashtu nga Kuvendi dhe Qeveria dhe se kjo është e njëjtë edhe në Kosovë, duke shtuar se “pa pasur një sistem gjyqësor dhe prokurorial të pavarur nga Qeveria, nga partitë politike, qoftë opozitë apo pozitë, pavarësisht dhe që i nënshtrohet vetëm ligjit, ne nuk do të kemi një luftë të suksesshme kundër krimit të organizuar, korrupsionit dhe formave tjera devijuese që ndodhin në shoqëri”.