Politika, biznesi më profitabil në Kosovë

Bazuar në analizën e njohësve të skenës politike në vend, për të gjitha proceset e deritanishme zgjedhore, që nga legjislatura e parë e tutje, deri te kjo e fundit, del një konstatim negativ, sipas të cilit klasa politika kosovare, pozitë e opozitë, nuk e ka synuar asnjëherë pushtetin, siç e thotë ligji, për t’u shërbyer qytetarëve dhe shtetit demokratik e ligjor, diçka që do të duhej të ndodhë në një shtet civil e demokratik, por përkundrazi lufta është bërë vetëm për t’u shërbyer klientelave, klaneve dhe bizneseve që janë të inkriminuara e shërbejnë gjithnjë si infuzion për politikën e tejkorruptuar dhe kriminale.

Interesi qytetar tërësisht i shkelur nga oligarkia pushtetare,shkruan gazeta Kosova Sot.

Bazuar në analizën e njohësve të skenës politike në vend, për të gjitha proceset e deritanishme zgjedhore, që nga legjislatura e parë e tutje, deri te kjo e fundit, del një konstatim negativ, sipas të cilit klasa politika kosovare, pozitë e opozitë, nuk e ka synuar asnjëherë pushtetin, siç e thotë ligji, për t’u shërbyer qytetarëve dhe shtetit demokratik e ligjor, diçka që do të duhej të ndodhë në një shtet civil e demokratik, por përkundrazi lufta është bërë vetëm për t’u shërbyer klientelave, klaneve dhe bizneseve që janë të inkriminuara e shërbejnë gjithnjë si infuzion për politikën e tejkorruptuar dhe kriminale.

Sipas njohësve të rrethanave politike 18-vjeçare në vend, është krijuar bindja se kjo politikë funksionon sipas qëllimit se ardhja në pushtet është vetëm për të zhvatur e plaçkitur shtetin e qytetarët, për të pasuruar, punësuar familjarët, rrethin klanet e militantët, por jo që t’u bëhet një shërbim i denjë qytetarëve të nëpërkëmbur të këtij vendi.

Prof. Muhamet Kelmendi thotë se është një e kaluar e mbrapshtë e funksionimit të skenës politike kosovare për gjitha këto vite.

Partitë udhëhiqen nga klane korruptive

Sipas Kelmendit, çështja e klasës politike dhe e pozitës së saj në shoqëri, si dhe të detyrave kundruall shtetit, nuk mbështetet në detyrat e ndërtimit të shtetit, por në interesat vetanake, të lidhura me grupe politike të interesit dhe me krim e korrupsion. “Aktualisht janë dy baza korruptive: E para, pozita shtetërore për të krijuar lidhje me oligarkët ekonomikë dhe nëpërmjet tenderëve. Dhe e dyta, vërja e politikës nën shërbim të krimit ekonomiko-financiar dhe të tregtisë, me qëllim të përfitimeve të mëdha dhe të realizimit të interesave pasurore të veta, të familjes, të grupit dhe të partisë që e ke në ballë. Tërë këto shkojnë bashkërisht”, theksoi ai. “Pa një parti të tillë, që udhëhiqet nga klanet e tilla korruptive, të lidhur me pushtet dhe me ekonominë informale, të mbështetur në krim dhe korrupsion, nuk mund të kemi pasurime të përmasave që i kemi aktualisht në vendin tonë”, u shpreh Kelmendi. “Le të merret çdo politikan dhe ekonomist e financier dhe të analizohet, do të shihet se pasuria e disponuar kurrsesi nuk përputhet me të ardhurat e fituara nga puna, apo veprimtaria ekonomike dhe tregtare. Vetë ky fakt tregon për korrupsion dhe krim. Nuk ka nevojë të merren në shqyrtim dhe të analizohen”, tha profesor Kelmendi për “Kosova Sot”.