Policia sekuestron 10 kilogramë duhan të kontrabanduar në aksin Kllokot-Viti, i dyshuari largohet nga vendi i ngjarjes

Gjilan – Një sasi prej rreth 10 kilogramësh duhan të përpunuar është sekuestruar nga Policia e Kosovës në rrugën Kllokot-Viti, në kuadër të hetimeve për veprën penale të kontrabandës me mallra.

Sipas njoftimit policor, rasti është regjistruar mbrëmjen e 9 qershorit 2026, rreth orës 21:10, kur drejtuesi i një automjeti nuk i është bindur urdhrit të zyrtarëve policorë për ndalim.

I dyshuari ka vazhduar lëvizjen dhe më pas ka braktisur automjetin, duke u larguar nga vendi i ngjarjes. Gjatë kontrollit të veturës, policia ka gjetur dhe sekuestruar rreth 10 kilogramë duhan të përpunuar, që dyshohet se ishte futur në mënyrë të kundërligjshme.

Autoritetet kanë nisur hetimet për identifikimin dhe kapjen e personit të dyshuar, ndërsa rasti po trajtohet në koordinim me organet kompetente të drejtësisë./rajonipress/