Policia: Radarët statik do të vendosën në fillim të 2017-ës

Radarët statik do të vendosën nëpër rrugët e Kosovës në fillim të vitit të ardhshëm, ka thënë për Indeksonline, Daut Hoxha zëdhënës i Policisë së Kosovës.

Sipas tij gjatë vitit 2017 Policia e Kosovës, do të pajiset me një sërë pajisjesh mobile duke përfshirë edhe radarët nëpër veturat e policisë.

“Ju njoftoj se çështja e rregullimit të infrastrukturës dhe sinjalistikës rrugore kërkon bashkëpunim, mbështetje dhe përpjekje intensive edhe nga akterët tjerë institucional si nga niveli lokal-komunal por edhe ai qendror-ministror.

Ne në kuadër të Policisë përveç angazhimeve për një bashkëpunim dhe bashkërendim të përpjekjeve në këtë aspekt kemi paraparë që në një të ardhme të afërt t’i ngritim kapacitetet tona edhe me pajisje mobile që mund të vendosen edhe nëpër vetura zyrtare për të qenë më efikas dhe efektiv në menaxhimin dhe kontrollin e trafikut rrugor, identifikimin e kryesve të kundërvajtjeve në rrugë me të vetmin qëllim parandalimin e aksidenteve në trafik dhe zvogëlimin e numrit të tyre”, ka thënë Hoxha. /Indeksonline/