Policia në ndjekje të Kurtit, Haxhiut e Topallit

Deputetët Albin Kurti, Albulena Haxhiu dhe Faton Topalli po zhvillojnë aktivitete gjithandej nëpër Kosovë, ku po takohen me qytetarë e aktivistë. Policia e Kosovës po i kërkon në Prishtinë, por nuk po arrin t’i arrestojë.

Policia e Kosovës nuk po lë “gur pa lëvizur” në përpjekje për t’i arrestuar tre deputetët e Lëvizjes “Vetëvendosje”, Albin Kurti, Albulena Haxhiu dhe Faton Topalli, për të cilët tri ditë më parë është lëshuar fletarrestimi nga Gjykata Themelore në Prishtinë.

Policia u ka rënë sërish në derë ligjvënësve opozitarë, që ndezën gazin lotsjellës në seancat plenare të Kuvendit të Kosovës. Derisa ata nuk u gjetën në shtëpi, sipas Lëvizjes “Vetëvendosje”, Kurti, Haxhiu e Topalli po vazhdojnë aktivitetet e tyre publike pa u “ndalur” nga askush.

Derisa tre deputetët e LVV-së po i shmangen Policisë, Njësia Speciale e Policisë së Kosovës të premten ka arrestuar njërin prej aktivistëve të kësaj Lëvizjeje, që mori pjesë në protestën e opozitës, pa njoftuar për identitetin e tij./zeri/