Policia konfiskon 2.8 metra kub dru pa dokumentacion në Gjilan, nis hetimi ndaj të dyshuarit

Gjilan – Policia e Kosovës ka evidentuar një rast të transportit ilegal të druve në lagjen Kacabaş të Gjilanit, ku është konfiskuar një sasi prej 2.8 metra kub dru që po transportoheshin pa dokumentacionin përkatës.

Sipas raportit policor, rasti ka ndodhur mbrëmjen e 8 korrikut 2026, rreth orës 19:30, kur njësitë policore, gjatë patrullimit, kanë ndaluar për kontroll një kamionetë me targa vendore, e cila drejtohej nga një i dyshuar mashkull kosovar.

Gjatë kontrollit është konstatuar se automjeti transportonte 2.8 metra kub dru pa dokumentet e nevojshme që dëshmojnë origjinën dhe transportin e tyre të ligjshëm.

Drutë janë konfiskuar dhe janë dërguar në Ekonominë Pyjore, ndërsa kamioneta i është kthyer drejtuesit. Lidhur me rastin është iniciuar procedurë e rregullt hetimore./rajonipress/