Policia i kërkon për t’i dëbuar 15 kosovarët, ata janë ‘zhdukur’

Në qytetin bavarian Furstenfeldbruck (Gjermani) nga mesi i javës që shkoi, Policia ishte nisur për t`i dëbuar nga Gjermania dy familje kosovare me gjithsej 16 anëtarë.
Por, në qendrën ku ata ishin të strehuar policët mundën të gjenin vetëm njërin nga të gjithë ata. Mbetet krejtësisht e paqartë se ku kanë mundur të “zhduken” 15 refugjatët në këtë mënyrë, transmeton albinfo.ch.

Por, ky nuk është rast i vetmuar. Ngjashëm kishte ndodhur edhe me një refugjat tjetër kosovar, i cili kishte shkuar për të marrë paratë e xhepit në qendrën e tij të strehimit në Fliegerhorst.

Përgjegjësit në këtë qendër kishin njoftuar menjëherë policinë pasi që ky person ishte prej kohësh në listën për t`u dëbuar. Por, dëbimi i tij, në muajin shtator kishte dështuar pasi që ai, sikur tash 15 bashkatdhetarët e tij, ishte “zhdukur”.

Ndërsa, tash policia e ka marrë atë por sërish e ka liruar. Shkaku i lirimit të tij është se në momentin kur është dashur të arrestohej (në muajin shtator) është dashur të ishte në qytetin Ingolstadt, por atje nuk e kishin gjetur. Tash, policia e ka liruar atë me lutjen që të shkojë sërish në Ingolstadt pasi që është kërkuar nga atje.