Policia e Kosovës ka arrestuar një të dyshuar për “grabitje” në një pompë karburanti në Kamenicë

Kamenicë – Një punëtorë i një Pompe të derivateve në Kamenicë ka lajmëruar Policinë e Kosovës (PK) se është grabitur nga dy persona të maskuar, njëri nga ta i armatosur me pushkë automatike. Sipas ankuesit, atij nën kërcënimin e armës i kanë grabitur para nga arka, ku ai punon.

Policia e Kosovës (PK), njësitet e hetimeve rajonale në Gjilan, në vazhdën e veprimeve hetimore përmes rrugëve operative kanë siguruar informacione të besueshme në bazë të të cilave është arrestuar i dyshuari L. L. (2000). I dyshuari është intervistuar në prani të avokatit mbrojtës. Janë gjetur prova të qëndrueshme, se ai së bashku me D. K. (1996) kanë kryer veprën penale “Grabitje”. Si provë material janë gjetur dhe sekuestruar arma automatike AK-47, e cila dyshohet se është përdorur në rastin e “Grabitjes”, dy duksa dhe një palë pantollona farmerka.

Me aktvendim të prokurorit të shtetit, i dyshuari L. L. është ndalur për 48 orë, ndërsa i dyshuari tjetër D. K. gjendet në arrati dhe është në kërkim të policisë. Rasti është duke u hetuar nga njësitet kompetente njoftoi Ismet Hashani./rajonipress/