Policët akuzohen se lejuan kontrabandë prej 20 deri në 50 euro ryshfet

Disa biznesmenë nga rajoni i Ferizajt kanë arritur t’u shmangen detyrimeve doganore në vlerë 112,915,64 euro, falë disa pagesave minimale që besohet se u kanë bërë tre zyrtarëve policorë të Kosovës.

Në këmbim të ryshfetit nga 20 deri në 50 euro, policët Hasim Kiki, Bekim Sylejmani, Samet Ballazhi akuzohen se kanë lejuar futjen e mallrave kontrabandë nga Maqedonia në Kosovë, shkruan Koha Ditore.

Këta zyrtarë policorë së bashku me 18 persona të tjerë, pronarë firmash të ndryshme dhe punëtorë të tyre akuzohen në pika të ndryshme nga Prokuroria Speciale e Kosovës për shpërdorim të pozitës zyrtare, kontrabandë me mallra, shmangie nga tatimi, marrje ryshfeti, dhënie ryshfeti, kalim i paautorizuar i kufirit e vepra të tjera.