Po shkëlqen me Empolin, Veselin e duan skuadrat e Serie A

Frederik Veseli është afër rikthimit në Serie A me skuadrën e tij Empoli.

Mbrojtësi shqiptar ka shkëlqyer këtë edicion në Serie B duke qenë shtylla në mbrojtjen e të kaltërve.

Skuadra italiane zë pozitën e parë në Serie B me 76 pikë të tubuara pas 37 ndeshjeve.

Pesë ndeshje para fundit të kampionatit, Empolit i duhet vetëm një fitore për ta siguruar matematikisht ngjitjen në elitën e futbollit italian.

Padyshim që ndër lojtarët më meritor për këtë sukses të klubit është Frederik Veseli.

25-vjeçari është aktivizuar në 27 ndeshje dhe ka dhuruar dy asistime këtë edicion.

Falë paraqitjeve të mira, interesim për të kanë shprehur edhe skuadrat aktuale të Serie A.

Mediat italiane kanë raportuar se Sassuolo, Bologna dhe Cagliari janë vënë pas reprezentuesit shqiptar.

Edhe pse duket e vështirë që Empoli të heqë dorë nga Veseli, skuadrat e lartpërmendura do të tentojnë transferimin e tij në verë. /Telegrafi/