Po shkëlqejnë në ligë e në kupë

Gjilan – Shënues: Sermaxhaj ’53, Salihu ’80. KF Gjilani po shkëlqen në Ligën e Parë të Kosovës, ku është renditur në vendin e parë dhe po mëton që të bëhet pjesë e Superligës së Kosovës, derisa edhe në garat për kupë, po mëton që të shkojë sa më larg. Këtë të enjte, ekipi gjilanas e ka arritur një synim të tillë, duke e mposhtur me rezultat të pastër 2:0, ekipin e Ferizajt, anëtar i Superligës. Gjilani – Ferizaj 2:0 (0:0).

Kanë qenë vendasit që kanë dominuar në pjesën e parë të lojës, duke pasur disa raste të mira shënimi, sidomos pas shpërthimeve të vazhdueshme nga Gashi nëpërmjet anës së majtë.

Efikasiteti i vendasve është treguar sidomos në pjesën e dytë, kur ia dolën të shënojnë dy gola. Fillimisht, në minutën 53 Sermaxhaj nga një pozitë ballore ka shënuar një gol të shkëlqyeshëm, duke goditur furishëm e topi që u përplas për tërthorëse, më pas u përplas edhe për pingule dhe u fut në rrjetë.

Vendasit ia kanë dalë që të shënojnë edhe njëherë në minutën 80. Kësaj radhe, Shala ka shpërthyer nga e majta dhe ka harkuar në anën e kundërt, ku u gjet Salihu, i cili ka qëlluar këndin e poshtë të djathtë të portës mysafire.

Stadiumi i Qytetit në Gjilan. Shikues: 200. Gjyqtarë: Raci – Selimaj – Berisha. Shënues: Sermaxhaj ’53, Salihu ’80. Kartoni i verdhë: Hyseni, Haklaj.

Gjilani: Maloku, Hyseni, Kosumi, Maliqi, Kastrati, Mustafa (Haklaj), Shala, Salihu, Sermaxhaj (Xhemajli), Ferati, Jetullahu (Morina). Trajner: Musa Selimi.

Ferizaj: Rexhepi, Istrefi, Idrizi, Tërshana, Shabani, Bardhi, Berisha, Idrizi, Bytuqi (Prekopuca), Kuka, Qerkini (Rusinovci). Trajner: Betim Sylejmani. /rajonipress/