Plagosje me armë zjarri në Kamenicë, arrestohen tre persona

Kamenicë – Një person ka mbetur i lënduar nga arma e zjarrit në Kamenicë, ndërsa Policia e Kosovës ka arrestuar tre të dyshuar lidhur me rastin.

Sipas raportit policor, ngjarja ka ndodhur më 9 maj 2026, rreth orës 23:10. Viktima, mashkull kosovar, ka pësuar lëndime nga arma e zjarrit dhe menjëherë i është ofruar trajtim mjekësor.

Lidhur me rastin, policia ka arrestuar tre persona të dyshuar, po ashtu meshkuj kosovarë. Pas intervistimit dhe me vendim të prokurorit, dy prej të dyshuarve janë dërguar në mbajtje për 48 orë, nën dyshimin për veprat penale “Shkaktim i rrezikut të përgjithshëm” dhe “Armëmbajtje pa leje”.

Ndërkohë, i dyshuari i tretë, i cili dyshohet për “Moslajmërim të veprës penale apo kryesve të saj”, është liruar në procedurë të rregullt.

Policia ka konfiskuar armën e zjarrit që dyshohet të jetë përdorur në rast, ndërsa hetimet janë duke vazhduar./rajonipress/