Pira: Është avancuar demokracia lokale në Viti

Viti – Kryesuesi i Kuvendit Komunal të Vitisë, Naim Pira ka mbajtur sot një konferencë për shtyp. Gjatë kësaj konference kryesuesi Pira ka folur për punën e Kuvendit Komunal të Vitisë gjatë vitit 2015, ku ndër tjerash bëri të ditur se të gjitha vendimet që janë marrë nga ky organ janë shpallur të ligjshme nga Departamenti Ligjor i MAPL-së. Ai po ashtu theksoi se për punën e mirë Kuvendi ka pranuar gjatë këtij viti një certifikatë nga Zyra Regjionale e OSBE-së në Gjilan.

Gjatë kësaj konference, Kryesuesi i Kuvendit Komunal të Vitisë, Naim Pira ka folur edhe për konferencat dhe mbledhjet të cilat janë organizuar në kuadër të punës së Kuvendit duke i cilësuar punën e këtij mekanizmi si të suksesshëm. “Me ligjin për vetëqeverisje lokale, Kuvendi Komunal është i obliguar të mbaj së paku 10 seanca të rregullta, mirëpo gjatë këtij viti që po e lëmë pas Kuvendi Komunal i Vitisë ka mbajtur 12 seanca të rregullta, 4 solemne. Po ashtu Komitet kanë qenë funksionale , Komiteti për Politikë dhe Financa (KPF) ka mbajtur 12 seanca të rregullta dhe Komiteti për Komiteti 6 seanca të rregullta të tyre” u shpreh Pira.

Ai tha se në kuadër të gjitha këtyre takimeve është bërë një punë e mirë siç tha ai në avancimin e demokracisë lokale, nxjerrjen e vendimeve të rëndësishme për qytetarët e Komunës së Vitisë.

Kryesuesi Pira njoftoj se gjatë këtij viti janë miratuar 44 vendime, 11 rregullore të cilat i konsideroj si shumë të rëndësishme për funksionimin normal të jetës së qytetarëve të kësaj komune.

Ai gjatë kësaj konference falënderoj të gjithë anëtaret e këtij kuvendi pa dallime në subjektet politike për punën dhe kontributin e tyre duke potencuar se një bashkëpunim të mirë ata e kanë edhe me Kryetarin e Komunës së Vitisë, Sokol Haliti.

Gjatë kësaj konference ai ka folur edhe për komitetet jo obligative të cilat janë formuar vitin e shkuar por edhe për punë të tjera të cila lidhën drejtpërdrejtë me Kuvendin Komunal. Më pas ai u është përgjigjur edhe pyetjeve të gazetarëve./rajonipress/