Pingpongu: Prokurori – Qeveri !

Nga Shefik Sadiku – Si qytetar i Republikës së Kosovës, sinqerisht, ndjehem keq dhe shumë i zhgënjyer me “lojën” e pingpongut, Qeveri – Prokurori.

Asnjë qytetar mendërisht normal i këtij vendi nuk duhet të ndjehet mirë me këtë gjendje, kur bartësit e dy institucioneve kardinale të vendit e urrejnë njëri-tjetrin, pavarësisht se të dy deklarojnë se nuk kanë asgjë personale mes vete.

E vërteta është se kreu i Qeverisë dhe kreu i Prokurorisë kanë inate mes vete e jo institucionet që ata përfaqësojnë. Pa pretenduar ta bëj akuzën apo avokatin për njërin apo tjetrin, e gjykoj rëndë gjendjen “armiqësore” në të cilën i kanë sjellë institucionet vitale të shtetit bartësit e këtyre institucioneve.

Si qytetar i i përgjegjshëm shumë besoj se qytetarët e këtij vendi i gjykojnë tendencat dhe veprimet e bartësve të këtyre dy institucioneve për ta shndërruar autoritetin dhe ndikimin e dy institucioneve në “armiqësi” për interesa dhe ego personale. Bartësit e institucioneve vijnë dhe shkojnë, por derisa ata kanë përgjegjësi duhet ligjshmërisht t’u shërbejnë qytetarëve, kurse institucionet që ata përfaqësojnë janë të përhershme e të përjetshme dhe si të tilla duhet të mbeten të paprekshme për interesa të askujt, sepse për këtë është sakrifikuar shumë.

Secili bartës i çdo institucioni shtetëror obligohet nga Kushtetuta dhe ligjet e vendit, që ta zbatojë Kushtetutën dhe ligjet deri sa ka përgjegjësi për respektimin e tyre.

Ky vend gjithmonë ka gjakuar për ligjshmëri dhe shtet të së drejtës për qytetarët e vet.
Secili i shërben atdheut aq sa di dhe aq sa mundet, kurse përgjegjësit ashtu siç e kërkon Kushtetuta e vendit.

P.S. Kërkoj nga lexuesit eventual të statusit tim, të mos komentojnë me emocione dhe ngjyrime politike. Gjendja është më serioze se sa shfrimet partiake ditore.