Piktori me renome ndërkombëtare Zeqirja Rexhepi, viziton shkollën ku bëri hapat e parë të dijes, Bujar Nevzati ka një falënderim të veçantë

Gjilan – Me rastin e 70-vjetorit të lindjes dhe 45-vjetorit të krijimtarisë artistike, sot shkollën tonë fillore “Skënderbeu” në Përlepnicë e vizitoi dhe e nderoi aktivisti, artisti dhe piktori i mirënjohur, Prof. Zeqirja Rexhepi – bashkëvendësi ynë i çmuar, i cili hapat e parë të dijes i mori pikërisht në këtë shkollë, për të vazhduar më pas në Shkollën e Mesme të Artit në Pejë dhe studimet në Akademinë e Arteve në Shkup e Prishtinë ka shkruar Bujar Nevzati.

Postimi i plotë:

Kjo vizitë e tij për ne ishte nder dhe privilegj i veçantë, sepse përveç pranisë së tij, ai solli edhe disa nga pikturat më të çmuara të historisë sonë më të re kombëtare: portretin e Komandantit legjendar të UÇK-së,”Adem Jashari”- krenaria e gjithë shqiptarëve, si dhe veprën monumentale “Egzodi i shqiptarëve 1999”, që pasqyron dhembjen dhe tragjedinë e shkaktuar nga masakrat dhe gjenocidi i ushtrisë dhe policisë serbe.

Ne si kolektiv i shkollës ishim shumë të nderuar nga kjo vizitë e pritur, duke e njohur mirë artistin tonë me përmasa kombëtare, Prof. Zeqirja Rexhepi, ku sot ai jeton dhe vepron në Kanada me familjen e tij të gjerë, por siç na tha vetë, zemrën dhe mendjen i ka gjithmonë në Përlepnicën e tij të dashur, në Gjilan dhe në Kosovë.

Nëpërmjet pikturave, vizatimeve dhe veprave të krijuara ndër vite, Prof. Zeqë pasqyron jo vetëm zhvillimin e tij si artist, por edhe dhimbjen, dashurinë, krenarinë dhe përkushtimin për vendlindjen, kulturën, artin, për nxënësit, për kolektivin e kësaj shkolle dhe gjithë qytetarët!

I përulemi me shumë respekt për gjithë atë mund dhe sakrificë që ka bërë për kombin tonë, duke i uruar jetë të gjatë, shëndet dhe frymëzim të pashtershëm në krijimtarinë e tij artistike.

Në emër të nxënësve, mësimdhënësve dhe gjithë stafit të SHFMU “Skënderbeu” – Përlepnicë, faleminderit nga zemra, Profesor Zeqirja Rexhepi./rajonipress/