Philip Kosnett ka vizituar Drejtorinë Rajonale të Policisë në Gjilan

Gjilan – Policia e Kosovës nga rajoni i Gjilanit të enjtën ka bërë përurimin e zyrës operative të Policisë së Kosovës në stacionin policor të Gjilanit. Përveç kësaj poashtu është bërë edhe instalimi i kamerave të sigurisë në qytetin e Gjilanit, të cilat do të monitorohen nga Policia e Kosovës.

Me këtë rast, ambasadori Amerikan z. Philip Kosnett së bashku me ICITAP-in dhe kryetarin e Komunës së Gjilanit z. Lutfi Haziri me bashkëpunëtorët e tij, e kanë vizituar Drejtorinë Rajonale të Policisë në Gjilan.

Komandanti i Stacionit Policor të Gjilanit Major Alban Ramushi e ka mirëpritur vizitën e ambasadorit Kosnett duke i shprehur kështu mirëseardhje dhe duke falënderuar edhe Ambasadën Amerikane, ICITAP-in si dhe Komunën e Gjilanit të cilët kanë ndihmuar në përmirësimin e kushteve të punës në stacionin policor të Gjilanit.

Policia e Kosovës në bashkëpunim të ngushtë me të gjithë faktorët e tjerë relevantë dhe strukturat e sigurisë, janë të përkushtuar që të krijojnë siguri dhe ambient prosperues për të gjithë qytetarët e saj./rajonipress/