Petroci përuron rrugët- kampion në participime

Gjilan – Të shtunën në fshatin Petroc në mënyrë solemne u bë inaugurimi i rrugëve lokale të asfaltuara .

Të pranishëm në këtë solemnitet ishin edhe Kryetari i komunës së Kamenicës Shaip Surdulli me bashkëpunëtorë , familjarë të dëshmorëve, mysafirë të ftuar tjerë si dhe bashkëvendësit e fshatit Petroc.

Shaip Surdulli ka thënë se sot kam gëzim të veçantë që jemi bashkë këtu me përfaqësuesit e komunës së Kamenicës, qëllimi i së cilës është përurimi i projektit të asfaltimit të rrugëve lokale të fshatit si dhe vendosjen e gypit të ujësjellësit përgjatë rrugës kryesore në fshat. “Kjo ditë e sotme është një festë e dyfishtë, ngase përveç përurimit të rrugëve dhe projekteve tjera që po bëhen, po shënohet edhe 100 Vjetori i Pavarësisë së Shqipërisë” ka thënë ai.

Surdulli ka thënë tutje se duke marrë parasysh gatishmërinë e banorëve të punëve dhe aksioneve të tyre për participimin në rregullimin e infrastrukturës, ne nuk kemi hezituar dhe nuk do të hezitojmë që t’ju përkrahim në aksionet dhe punimet në zhvillimin e jetesës në fshatin tuaj .

Surdulli tha se duke u bazuar në planin zhvillimor komunal, i cili është në përfundim e sipër, janë duke u zhvilluar debate publike me qytetarë i cili plan do të aprovohet, me siguri në fund të këtij viti, ku me këtë projekt do t`i hapim rrugë investitorëve të brendshëm, por edhe të jashtëm që ta përkrahin komunën e Kamenicës edhe më shumë për zhvillimin e saj , jo vetëm në infrastrukturë , por edhe në lëmi të tjera si në bujqësi, ekonomi, xehetari dhe të tjera.

Lazim Maliqi , Kryetar i Këshillit lokal të fshatit Petrit, foli për historikun e fshatit Petroc, duke shtuar se në periudhën e pas luftës Petroci dhe petritasit , fillojnë një betejë me ndërtimin dhe rindërtimin e fshatit ku në këtë betejë dolëm fitimtar, prandaj jam krenarë që mund të numëroj sukseset dhe të arriturat e fshatit, falë bashkatdhetarëve dhe komunës së Kamenicës.

“Pas luftës kemi asfaltuar rrugët dhe kemi sjellë në fshat telefonin fikse ,për kundër pengesave të mëdha, në periudhën e pasluftës fillon një periudhë e sukseseve të pakontestueshme në fshat, falë ndihmës së komunës së Kamenicës dhe komunitetit kemi ndërtuar xhaminë e fshatit, po ashtu kemi rregulluar rrjedhjen e ujërave të zeza me ndihmën e komunës si dhe me participim të qytetarëve, kemi rregulluar rrjetin elektrik me tri trafa, dy janë donacion i përbashkët komunë – komunitet , po ashtu është bërë ndriçimi i gjithë fshatit me ndihmën e komunës dhe qytetarëve” , tha Maliqi .

Ai më tej shtoj se falë kontributit të komunës me Kryetarin Shaip Surdulli, bashkatdhetarëve pa harruar kontributin e banorëve të cilët jetojnë këtu ,e sidomos kontribut të madh kanë dhënë veprimtarët: Xhavit Ajeti dhe këshilltari komunal Ismajl Sopi për asfaltimin dhe shtrirjen e ujësjellësit në fshat.

Hamide Latifi, banore e fshatit, tha se jemi shumë të kënaqur për asfaltimin e rrugëve lokale të fshatit kurse për Bajram Ajetin, asfaltimi i rrugëve ishte diçka shumë e rëndësishme./rajonipress/