Situatë e tensionuar politike në Kosovë. Askush nga Qeveria nuk ka guxuar të komentojnë mbi 100 mijë nënshkrimet
Opozita e konsideron peticionin referendum kundër marrëveshjeve me Serbinë dhe qeverisjes kriminale, të dy partive të mëdha që e kanë kapur dhe po e zhvatin shtetin
Subjektet politike opozitare, që kanë ndërtuar së fundi një bllok të përbashkët për të kundërshtuar qeverinë e vendit dhe marrëveshjet e 25 gushtit, të nënshkruara në Bruksel, me theks të veçantë ato për Asociacionin dhe Demarkacionin e kufirit me Malin e Zi, kanë paralajmëruar rishtas se nuk do të lejojnë mbarëvajtje të rregull të punës së Kuvendit, por do ta pamundësojnë atë, derisa qeveria e Kosovës nuk reflekton në kërkesat e tyre.
Këto parti konsiderojnë se tani me tejkalimin e shifrës së mbi 100 mijë nënshkrimeve në peticionin që po e nënshkruajnë qytetarët e Kosovës, kundërshtimi i marrëveshjeve dhe qeverisja e kriminalizuar ka marrë një lloj vote kundër që mund të krahasohet me një referendum popullor.
Në pyetjen tonë adresuar Qeverisë së Kosovës, se si do t’i përgjigjet ajo 100 mijë qytetarëve që i kanë thënë “jo” marrëveshjeve me Serbinë, kemi mbetur pa përgjigje. Subjektet politike në opozitë kërkojnë reflektimin e Qeverisë në këtë peticion, duke mos e përjashtuar mundësinë e kompromisit edhe për një lloj qeverie transitore, qeveri të shpëtimit kombëtar deri në zgjedhjet e reja të parakohshme me një mandat 6-9 muaj, deri në përgatitjen e mirë të këtyre zgjedhjeve që të mos ketë mundësi të manipulimit dhe të blerjes së votave./kosova sot/
