Peticion për heqjen e lapidarit të xhandarmerisë serbe

Me anë të një peticioni banorët e fshatit Lluçan të komunës së Bujanocit kërkojnë heqjen e lapidarit të xhandarmerisë serbe të vendosur në periferi të këtij fshati. Peticioni i firmosur nga qindra banorë i është adresuar kryeministrit serb, Ivica Daçiq, ambasadorit amerikan në Beograd, Michael Kirby, OSBE dhe Trupit Koordinues për Luginën e Preshevës.

“Ne jemi të shqetësuar për vendosjen e këtij lapidari në këtë zonë kryesisht të banuar me shqiptarë dhe për një veprim pa asnjë njoftim paraprak dhe pa pëlqimin e banorëve. Ne e përjetojmë këtë përmendore si një lloj shprehje të imagjinatës nënshtruese ndaj shqiptarëve, edhe pse veprimet luftarake u ndërprenë në këtë rajon me një marrëveshje paqësore”, thuhet në peticionin e banorëve ku janë shprehur pakënaqësitë, diskriminimi, eksodi i qytetarëve të fshatit dhe mungesa e sigurisë.

Banorët kërkojnë urgjentisht heqjen e këtij lapidari të militarëve dhe paramilitarëve serb, nga atari kadastral i fshatit Lluçan, pasi me këtë uzurpohet toka e fshatit dhe paraqet një akt terrorizues ndaj banorëve, raporton ina. “Nëse strukturat shtetërore nuk e veprojnë në pajtim me peticionin tonë, atëherë jemi të detyruar për tu shpërngulur, sepse nuk ndjehemi të sigurt dhe se kjo zonë është shëndërruar në zonë militarizuese”, thuhet në reagim.