Përzgjedhësi i Kombëtares U19 Adil Maliqi: Ndaj Maltës kërkojmë fitore

Kombëtarja e Kosovës U19 në futboll, në dy ndeshjet kualifikuese për Kampionatin Evropian, të cilat po zhvillohen në Maltë, ka treguar përformancë të jashtëzakonshme.

Në ndeshjen e parë ka barazuar me Sllovakinë me rezultat 1-1, ku në këtë ndeshje “dardanët” ishin shumë më të mirë së kundërshtari, por fati u kishte kthyer shpinën.

Në ndeshjen e dytë, të përzgjedhurit e Maliqit, kanë deklasuar favoritin Ukrainën me rezultat të thellë 4 – 0, duke hapur mundësinë që të jenë në aktin final – “Elite Round”, me 15 korrik të vitit të ardhshëm në Irlandën e Veriut.

Për të qenë pjesë e “Elite Round”, Kosova nesër duke filluar në ora 14:30 duhet ta mposhtin nikoqirin Maltën për të qenë fituese e grupit të shtatë.

Përzgjedhësi i Kombëtares së Kosovës U19, Adil Maliqi para kësaj përballje ka qenë mjaft i matur. “Ne nuk e nënçmojmë asnjë kundërshtarë, të gjitha Kombëtaret kanë synimet e tyre. Me Përfaqësuesen e Maltës do të jetë një ndeshje ku kërkojmë fitore dhe të dëshmojmë se shteti i Kosovës ka potencial për të arritë rezultate të mira kudo që paraqiten. Të gjithë futbollistët janë të gatshëm të japin ma të mirën e tyre para kësaj sfide shumë të rëndësishme. Me shumë optimizëm presim fitore për të qenë lider i grupit të shtatë, ndërsa në mesin tonë nuk ka vetëkënaqësi, potencialin tonë do ta shfaqim në fushën e blertë”.

Ekspedita e Kombëtares së Kosovës U19 pritet të kthehet në atdhe të mërkurën.