Përurohet libërthi i gjeneratës “Gjurmët e punës” të përgatitur nga mësuesja Azize Ramadani

Gjilan – Në lokalet e Shkollës fillore “Thimi Mitko”, në Gjilan, u bë përurimi i libërthit i gjeneratës V-8 të përgatitur nga Azize Ramadani – Shabani, mësuese e shkollës në fjalë. Këtë program përmbyllës kulturor e ka organizuar kujdestarja në fjalë, e cila është hera e tretë e këtyre manifestimeve të rralla shkollore. Në program morën pjesë kolegë të punës, prindër, familjarë, nxënës dhe mysafirë tjerë të ftuar.

Fillimisht, mësuesja Azize Ramadani tha se, sot me promovimin e libërthit me titull “Gjurmët e punës” është ky manifestim përmbyllës për 5 vite të vlefshme me nxënësit e saj, të cilët për te ishin si fëmijë të dytë. “Ndjehem jashtëzakonisht krenare me secilin prej tyre, sjelljet e tyre, interesimin që treguan gjatë këtyre viteve, të cilët, sa herë kam dalë para tyre e kam ndie vetën shend e vetë. E kam ndjerë vetën si një Afërditë e kësaj kohe. Prandaj, shtoi ajo,- Uroj që suksesi i klasës sime të jetë i merituar dhe të mos mungojë asnjëherë”.

Aty u gjend edhe ish-mësuesja e Azize Ramadanit, Rafete Jakupi, e cila njëkohësisht është edhe lektore e libërthit të gjeneratës në fjalë. Edhe ajo tha se, “është e privilegjuar që është pjesë e këtij libri duke shpresuar që këto iniciativa të mos mungojnë asnjëherë dhe të bëhen shembull për mësimdhënësit e tjerë që e ushtrojnë dhe e duan këtë profesion të ndershëm e të shenjtë. Ajo tha edhe këtë se, ishte nxënësja e saj Azize Ramadani, e cila po shkon gjurmëve të saj dhe po bënë punë të shkëlqyer duke arritur suksese të shumta me shkollarët e vegjël në këtë shkollë qyteti”.

Siç dihet, libërthi “Gjurmët e punës” është botuar për të tretën herë me radhë, i cili i është kushtuar gjeneratës së klasës V-8. Prandaj, ky tekst ka për qëllim promovimin dhe shpalosjen e punës së nxënësve përgjatë pesë viteve shkollore. “Gjurmët e punës III” në vete ngërthen aktivitetin e mësueses rreth klasës, ku bëhet fjalë për mësuesen e klasës, biografitë e nxënësve me disa nga shkrimet e tyre në poezi, prozë, ese e forma të tjera shkrimi. Këtu zënë vend 23 shkollarë, të cilët shkëlqejnë me biografitë e tyre të shkurtra dhe premtuese. Po ashtu, aty janë të botuara disa nga poezitë e tyre, të cilat artikulojnë cicërimat e ëmbla e ngrohtëse të këtyre dritave të jetës. Të vegjlit e kësaj klase kanë shkruar poezi për prindërit e tyre, 8 Marsin, mësuesen, gjyshit, familjes, stinën e pranverës etj.

Vlen të përmenden edhe dy nga studentët e Fakultetit të Edukimit, të cilët kanë mbajtur praktikën pedagogjike në këtë klasë që është shembull e shkollës. Këta dy studentët kanë bërë komentet e tyre rreth mësueses dhe klasës. Në fund është fjala e lektores dhe disa fotografi që e kanë “qëndisur” këtë “projekt” rreth aktiviteteve të realizuara nga mësuesja dhe nxënësit e klasës në fjalë.

Në fund të këtij përurimi, nxënësit i lexuan shkrimet e tyre, të cilat, si një, i relaksuan pjesëmarrësit e këtij programi kulturor. Po ashtu është shfaqur edhe një program me këngë e recitime nga shkollarët e kësaj klase./tefik selimi/rajonipress/