Përkundër mos llogaridhënies së menaxhmentit, Qeveria premton buxhet të rregullt për RTK-në

Ministri i Financave në Qeverinë e Kosovës Avdullah Hoti përmes rrjetit social Facebook ka akuzuar menaxhmentin e Radio Televizionit të Kosovës për mos llogaridhënie rreth shpenzimeve të parasë publike.

Përkundër kësaj, transmeton Koha.net, ai ka siguruar menaxhmentin dhe punëtorët e RTK se Qeveria do të sigurojë buxhet të rregull për këtë transmetues publik.

Hoti ka shkruar:

Qeveria e Kosovës është e përkushtuar në gjetjen e zgjidhjes për financim afatgjatë dhe të qëndrueshëm për RTK-në, bazuar në përvojat më të mira ndërkombëtare. Punëtorët e RTK-së të ndihen të sigurt për punësimin dhe të ardhurat e tyre, të vazhdojnë punën të qetë dhe me profesionalizëm, ashtu siç e kanë bërë deri më tani, siç i obligon Ligji për RTK-në dhe të refuzojnë çdo formë ndikimi në politikat redaktuese.

Sqaroj se Ligji për RTK-në e ka rregulluar financimin e RTK-së për një periudhë transitore trevjeçare, që ka mbaruar në prill 2015. Rrjedhimisht, në propozim-buxhetin për 2016, Qeveria nuk ka mundur ligjërisht të parashohë linjë buxhetore për RTK-në. Tani që buxheti është në Kuvend, në përputhje me ligjin Qeveria ka ofruar amendament për financimin e RTK-së. Mbetet në kompetencë të Kuvendit të vendosë. Propozimet e mia të bëra në Komisionin për Buxhet dhe Financa janë qëndrime të Qeverisë. Z.Mentor Shala nuk e ka të qartë si funksionon Qeveria dhe Kuvendi kur deklaron se kam dal jashtë kompetencave të mia si Ministër i Financave. Në edicionin e ditës së enjte, Drejtori i Përgjithshëm i RTK-së, Mentor Shala, e ka keqpërdorur transmetuesin publik duke e sulmuar Ministrin e Financave.

Duke qenë se RTK përdorë para publike, duhet të ketë llogaridhënie ndaj Kuvendit të Kosovës dhe agjencive të pavarura siç është Auditori i Përgjithshëm. Raporti i RTK-së dhe i Auditorit të Përgjithshëm nuk kanë kaluar për dy vite radhazi në Kuvend. Kuvendi duhet të shqyrtojë dhe vendos për raportin e RTK-së, përfshirë edhe shpenzimin e 9.3 milion eurove në vitin 2014 dhe 9.7 milion gjatë këtij viti, si dhe tejkalimeve në shpenzime.

RTK-ja ka pavarësi të plotë editoriale dhe kushdo që ndërhyn në këtë pavarësi e shkel ligjin e RTK-së. Por, menaxhmenti i RTK-së nuk mund të fshihet pas pavarësisë editoriale dhe të mos ofrojë transparencën e nevojshme për mënyrën e shfrytëzimit të parasë publike.

E theksoj edhe një herë, se buxheti i RTK-së do të sigurohet plotësisht, në një formë ose tjetër. Prandaj, vlerësoj se menaxhmenti i RTK-së me sjelljet që po bënë po tregon se nuk e ka problemin tek buxheti. Problem për ta është llogaridhënia.

http://koha.net/?id=27&l=86262