Përfundon takimi LDK-VV, ende s’ka marrëveshje

Negociatat në mes të Lëvizjes Vetëvendosje dhe Lidhjes Demokratike të Kosovës kanë vazhduar për më shumë se dy orë në objektin e Kuvendit të Kosovës, në përpjekje për të arritur një marrëveshje për bashkëqeverisje, por ajo nuk u arrit. Këtë e konfirmuan para kamerave Avdullah Hoti nga LDK’ja dhe Glauk Konjufca nga VV’ja.

“Ne po i vazhdojmë takimet, nuk e kemi përmbyllur ende marrëveshjen, ditëve tjera do të takohemi”, është shprehur Hoti.

Hoti tha se bisedimet do të vazhdojnë mes partive.

“Nuk është përfunduar ende krejt, ende nuk kemi ardhur në një konkludim, duhet të bisedojmë edhe më shumë”, ka thënë Hoti.

Gjithashtu edhe Konjufca tha se nuk ka marrëveshje.

“Nuk pati marrëveshje, krejt cka mund t’iu them është se duhet të shohim çka mund të ndodhë në takimet e radhës”, ka shtuar Konjufca./express/