Përfundon Liga Regjionale në futboll të vogël, nderohen më të mirët

Gjilan – Liga Regjionale (RPZH) Gjilan ndanë çmimet për ekipet fituese Në një eveniment të organizuar nga Liga Regjionale e Futbollit të Vogël (RPZH-Gjilan) u ndanë çmimet për ekipet fituese në Ligën e Juniorëve, Ligën e Dytë dhe në Superligë. Në fjalën e tij kryetari i Ligës Regjionale, Mensur Morina tha se ndjehet i lumtur për përfundimin në mënyrë kaq madhështore të sezonit të Parë të Ligës Regjionale (RPZH) Gjilan, ku falënderoi ekipet pjesëmarrëse, sponsorin gjeneral “Kompaninë e ujit DEA”, mediat si dhe të gjithë të pranishmit.

Ai tha se Liga Regjionale (RPZH) Gjilan si pjesë të organizimit të saj numëron 34 ekipe në Superligë dhe në Ligën e Dytë si dhe 12 ekipe në Ligën e Juniorëve, të cilat u përballën mes veti për të marrë vendin e fituesit të Ligës.

Në Superligë pas 19 gjirove titullin Kampion e mori “K.F. ABIMARKET” me 17 fitore, 1 barazim dhe 1 humbje, e përcjellur në vend të dytë nga “K.F. LLASHTICA” dhe në vend të tretë “K.F. ARBERIA 06”, të cilave edhe i’u dha shpërblimi i premtuar nga Kryesia e Ligës Regjionale.

Në Ligën e Dytë pas 15 gjirove kryesues doli “K.F VELEKINCA” me 13 fitore dhe 2 barazime duke e fituar titullin vetëm në bazë të golave të shenuar më shumë nga vendi i dytë, ku me pikë të barabarta gjendet “K.F. Italia e Vogël” dhe në vend të trete është “K.F.Shkendija”, këto tri ekipe përveç shpërblimeve që morën sezonin tjetër do të jenë pjesë e Superligës.

Poashtu edhe në Ligën e Juniorëve u ndanë shpërblimet ku fitues i titullit doli ekipi “K.F. PERLEPNICA TRANS“ me 11 fitore dhe 1 barazim, e ndjekur nga vendi i dytë “K.F LLASHTICA” dhe nga vendi i tretë ku gjenden “K.F. TRIMAT”, poashtu fitues i Kupës së Ligës Junior ishte “K.F. PERLEPNICA TRANS” .

Mirënjohje të veçantë u ndanë edhe për referët e Ligës Regjionale, mediat të cilat ndihmuan në promovimin e Ligës e poashtu edhe për Sponsorin Gjeneral të Ligës, Kompaninë e Ujit “DEA”.

Në fjalën e tij përfaqësuesi i saj, Alban Shala tha se ndjehet i lumtur për mbarëvajtjen e Ligës në sezonin e parë e poashtu përmendi që ata janë gjithmonë në ndihmë të sportit. “Ne gjithmonë kemi përkrahur sportin e Komunës së Gjilanit, do të vazhdojmë ta bëjmë këtë edhe në të ardhmen e sidomos aty ku është e përfshirë me të madhe rinia” theksoi Shala.

Në fund mirënjohje u ndanë edhe për lojtarët më të mirë në secilën Ligë ku “Lojtari më i mirë në Superligë” u zgjodh Armand Sadiku nga (K.F. ABI MARKET), “Lojtari me i mire ne Ligen e Dyte” Ermir Kryeziu nga (K.F. ITALIA e VOGËL) si dhe “Lojtari më i mirë në Ligën e Juniorëve” Lavdrit Mehmeti nga (K.F. PERLEPNICA TRANS).

Liga Regjionale do vazhdojë sezonin e ardhshëm nga fillimi i muajit maj./rajonipress/