Përfundon kapitulli i parë i mobilitetit në Kamenicë

Kamenicë – Sot është mbajtur takimi i punës së grupit drejtues dhe grupit punues për mobilitetin në Komunën e Kamenicës me mbështetjen e Projektit DEMOS nga HELVETAS.
Draftin e parë e kanë prezantuar Zyrtari i Qarkullimit Rrugor Hysen Jerliu dhe drejtori i Shërbimeve Publike dhe Inspeksionit Faton Jakupi.

Nënkryetari i Kamenicës Fatmir Matoshi, ka folur për rëndësinë e këtij projekti dhe ka përshëndetur punën e bërë deri më tash dhe mbështetjen e dhënë nga DEMOS. “Është mirë që në kuadër të këtij plani të parashohim projekte trë cilat janë të realizueshme përsa i përket mobilitetit në qytet ndërsa të japim idetë dhe vizionin tonë për lidhjen e Kamenicës me Komunat e tjera. Shtigjet e çiklistëve kanë një rëndësi të veçantë si për ruajtjen e ambientit ashtu edhe për mundësitë më të mira që mund të gëzojnë qytetarët e Kamenicës. Viti 2017 mund të jetë viti i realizimit të shtigjeve të çiklistëve, ndërsa duhet kushtuar një kujdes të veçantë edhe parkingjeve dhe sinjalistikës rrugore në qytet. Kryetari Sinani dhe e gjithë udhëheqja e Komunës së Kamenicës janë të interesuara që sa më mirë të kryhet ky projekt dhe u jemi mirënjohës DEMOS-it për mbështetje” ka thënë nënkryetari Matoshi.

Për kapitullin e parë kanë folur edhe përfaqësuesit e DEMOS-it duke shprehur gatishmërinë që të ndihmojnë edhe në kapitujt e radhës. Ermira Salihu nga DEMOS ka thënë se në kapitujt e radhës do të precizohen gjërat konkretisht dhe do të përfshihen edhe kostot financiare.

Grupi punues është dakorduar edhe për agjendën e punës për të ardhmen./rajonipress/