Përfundon greva politike

Greva e mësimdhënësve ka përfunduar pas tri javësh bojkotimi të procesit mësimor, ndonëse kërkesat e SBASHK-ut nuk u plotësuan. Përfaqësues të Këshillit të Prindërve, por edhe ekspertë të arsimit thonë se u dëshmua që greva kishte ngjyrime politike, duke e drejtuar gishtin akuzues kah PDK-ja. Sipas tyre, vendimin për ndërprerjen e grevës do të duhej ta merrte kryeministri Haradinaj e jo kryeparlamentari Veseli, shkruan Gazeta “Zëri”.

Udhëheqësit e Sindikatës së Bashkuar të Arsimit, të Shkencës dhe të Kulturës së Kosovës (SBASHK) nuk i kanë ndenjur prapa premtimit të tyre për vazhdimin e grevës së mësimdhënësve derisa të arrihej rritja e koeficientit prej 30 për qind, gjë që nënkupton edhe rritje të pagave.

Pas grevës trijavore mësimdhënësit kanë pranuar propozimin e kryeparlamentarit Kadri Veseli dhe të kryeministrit Ramush Haradinaj për rritje të koeficientit për më pak se 20 për qind.

Nënkryetarja e SBASHK-ut, Vjollca Shala, në një intervistë për “Zërin” ka thënë se përmes marrëveshjes së arritur janë përafruar kërkesat e tyre për rritje të koeficientit.

Mirëpo mbajtja e grevës dhe ndërprerja e saj ende pa i realizuar kërkesat e mësimdhënësve është konsideruar si politike.