Përfundon edicioni për Bytyçin

Mesfushori kosovar Sinan Bytyçi, nuk do të luajë më këtë edicion. 20-vjeçari është lojtar i Manchester Cityt, ndërsa në janar u huazua deri në fund të edicionit te skuadra holandeze Cambuur, shkruan sot Koha Ditore.

Ai u lëndua në fundjavë, ndërsa kontrollimet mjekësore të bëra të martën kanë dëshmuar se bëhet fjalë për një dëmtim serioz, që do ta mbajë anëtarin e U-21 të Austrisë jashtë fushës për disa muaj. “Sinan Bytyçi në fundjavë, në ndeshje kundër Heracles u largua nga fusha në minutën e 23-të.

Për kontrollimit të detajuar të bërë të martën, është dëshmuar se lëndimi i tij nuk është i lehtë. Ai ka këputur ligamentet dhe është e qartë që nuk do të luajë më këtë edicion”, ka shkruar sajti i Cambuurit, që garon në kategorinë e parë të Holandës.

Bytyçi vlerësohet si lojtar me të ardhme te City. Ai në janar firmosi për dy vite e gjysmë me gjigantin anglez dhe u huazua menjëherë. “Lëndimi nuk do të më ndal që të realizoi ëndrrën. Do të bëjë çdo gjë që të kthehem më i fortë si lojtar e si njeri. Tani është e rëndësishme të kthehem dhe të dëshmojë se sa i fortë jam”, ka thënë Bytyçi. Ai luajti tetë ndeshje në kampionatin holandez.