Për sulm ndaj personave zyrtarë dënohen me burgim efektiv

Gjilan – Gjykata Themelore në Gjilan ka shpall aktgjykim dënues ndaj të akuzuarve Ramadan Kastrati, Arsim Kastrati dhe Feti Kastrati. Me datë 23.11.2017 me urdhër të Gjykatës, Policia e Kosovës ka zhvilluar një operacion për bastisje tek shtëpia e të akuzuarve në fjalë në fshatin Karaqevë e Epërme. Gjatë bastisjes policia ka hasur në rezistencë nga këta persona, duke fyer dhe sulmuar zyrtarët policor, të cilët më pas kanë marr edhe trajtim mjekësor.

Me këtë rast Policia e Kosovës ka arritur që të zhvilloj operacionin e saj dhe ka arritur të konfiskoj një armë gjuetia, 12 mm me 32 fishekë, si dhe një pistoletë të kalibrit 7.65 mm, me 17 fishekë.

I akuzuari Ramadan Kastrati me këto veprime ngarkohet me veprën penale 1) sulm ndaj personit zyrtar gjatë kryerjes së detyrës zyrtare, mbajtja në pronësi, kontroll ose posedim të paautorizuar të armëve, kanosje.

Trupi gjykues pas shqyrtimit të shkresave të lëndës të akuzuarit Ramadan Kastrati ka shqiptuar një dënim unik prej 1 (një) vit burgim dhe një dënim me gjobë në shumën prej 500 (pesëqind) euro.

Ndërkohë të akuzuarit Arsim Kastrati dhe Feti Kastrati dënohen me nga 3 (tre) muaj burgim efektiv. Palët kanë të drejtën e ankesës ndaj këtij vendimi në Gjykatën e Apelit./rajonipress/