Për rastin Medikus një i arrestuar në Izrael

I dyshuari për trafikim organesh, Yusuf Sonmez, i arrestuar në Turqi, ka dërguar në Prishtinë avokatin e tij, Cem Murat Sofuoglu, për të kërkuar bashkëpunim me gjykatën në lidhje me rastin “Medikus”.

Avokati i Sonmezit ka kërkuar që klienti i tij të jetë dëshmitar i mbrojtur dhe është i gatshëm të japë dëshmi nëpërmjet videolidhjes, por trupi gjykues ka qortuar avokatin e Sonmezit për praninë e tij në sallën e gjykimit, duke thënë se prania e tij mund të ndikojë që të mbledhë prova në favor të klientit të tij, pasi që dihet se procesi kundër Sonnezit është i ndarë nga ai i “Medikusit”, njofton KTV.

Ndërkohë, prokurori i rastit, Jonatan Ratel, ka bërë të ditur se policia izraelite ka arrestuar para dy ditëve edhe Mose Harellin, i cili është i dyshuari tjetër i trafikimit të organeve njerëzore.

Rateli ka bërë të ditur se do të kërkojë zyrtarisht nga Izraeli që ta ekstradojnë Mose Harrellin në Kosovë dhe të gjykohet këtu, por nuk ka siguruar që një gjë e tillë do të bëhet pasi që për ekstradim duhet të ketë një marrëveshje ndërmjet dy vendeve.

Hareli ishte arrestuar më herët në Kosovë dhe ishte liruar me kusht, por nga ai moment ishte larguar nga Kosova dhe nuk ishte kthyer më. /Telegrafi/