Për komandantin e veriut s’pyetet drejtori i Policisë

Një udhëzim administrativ që e kishte firmosur në fillim të korrikut ministri i Punëve të Brendshme, Bajram Rexhepi, i jepte një varg kompetencash drejtorit të përgjithshëm të Policisë, në procedurën për emërimin e komandantit policor të veriut.

Por, dokumenti është shfuqizuar me një tjetër udhëzim administrativ që mban datën 22 korrik, në të cilin drejtori zhvishet prej çfarëdo kompetence në këtë procedurë, shkruan “Koha ditore”. Ministria nuk ka pasur një përgjigje për këtë veprim. E, në Kuvend kanë thënë se udhëzimi administrativ është në kundërshtim me Ligjin për Policin.

“Para se të ndodhin veprime të tilla, ne si komision kemi konsideruar se duhet vepruar në bazë të ligjit, ndërsa në bazë të marrëveshje është ikur nga ligji bazik, i cili saktësisht përcakton detyrat e drejtorit dhe emërimit të komandantit të Policisë Rajonale”, ka thënë Ahmet Isufi, kryetar i Komisionit parlamentar për punë të brendshme. “Ka diskrepanc në mes të ligjit dhe udhëzimit që është nxjerr, prandaj të gjitha ato që kanë qenë çështje të Marrëveshjes janë edhe tejkalim i bazës ligjore”, ka shtuar ai. /Indeksonline/