Pensionohet Remzi Ahmeti, një profesor i zellshëm që edukoi shumë gjenerata

Gjilan – Remzi Ahmeti profesor shumëvjeçar dhe së fundit edhe inspektor i arsimit është pensionuar për ta rrumbullakuar me sukses karrierën e tij prej pedagogu. Remzi Ahmeti padyshim mbetet një nga profesorët më të zellshëm që edukoi shumë breza. Ishte i dashur, i sinqertë me nxënësit, i edukuar dhe fjalë pak. Të tillët si profesor Remziu do i mungojnë gjatë fushës së arsimit.

Remzi Ahmeti një nga profesorët më të mirë të të gjitha kohërave që ka pasur arsimi gjilanas është pensionuar në ditën e tij të lindjes. Profesori Remzi do të mbahet mend gjatë nga gjeneratat e shumta për kujdesin që ka treguar, për edukatën e tij familjare dhe profesionale që e ka transmetuar tek gjeneratat e shumta.

Për profesori Remzi ka shumëçka të shkruhet e thuhet, por kësaj radhe po e japim një postim emocionues të vajzës së tij Feride Ahmeti që ia ka kushtuar babait të saj në ditën e lindjes dhe në ditën e pensionimit.

Postimi i Feride Ahmetit

Gjashtë maji, është sot një festë e dyfishtë për ty Babi, është ditëlindja dhe PENSIONIMI yt.
Unë dhe gjithë familja jemi krenar me ty sepse gjatë gjithë kohës ishe kujdesi, sakrifica dhe shembulli i jetës tonë. Jemi krenar që të kemi baba sepse tërë jetën na kushtove neve, fëmijëve tu, nxënësve dhe arsimit të brezit të ri në Kosovë.

Punove si profesor i zellshëm dhe i kujdesshëm në edukimin e gjeneratave të reja!
Pastaj ishe inspektor i arsimit në një punë sistematike, të palodhshme dhe të përkushtuar në arsim për kontributin e çmueshëm, ishe njeri i vëmendshëm dhe i afërt me edukatorët, i qetë dhe këshillëdhënës, kurdoherë në shërbim të arsimit cilësore në atdheun tonë.
Do të mbetesh në kujtesën e mësimdhënësve me butësinë tënde dhe dashamirësinë që e rrezatoje.

Baba kurrë nuk të mbajmë mend për ndonjë qortim!
Ishe mësuesi dhe shoqëruesi jonë gjatë gjithë këtyre viteve, këshillat tua janë si melodia më e ëmbël për neve, shpresoj të jesh krenarë me neve, sepse na vërtetë jemi shumë krenarë dhe me fat që kem një babë si ty.

Sot kur po e feston ditëlindjen e 65-të, të shprehim mirënjohjen, dhe mbi të gjitha “Faleminderit për gjithçka”.
Urime ta gëzosh pensionimin, paq gjithmonë shëndet BABË.

Shpërndaje.
© RAJONIPRESS