Pensionohet motra medicinale Nafije Qamili

Gjilan – Nafije Qamili karrierën e saj në mjekësi e filloi në mars të vitit 1977 si motër kryesore e cila plot 45 vite i shërbeu me nder qytetarëve të Anamoravës e më gjerë me respektin më të madh.

Nafija në fillim të karrierës së saj ishte betuar në betimin e Hipokratit se me tërë dijen dhe qenien e saj do t`i shërbej pacientëve të saj.

Motra Nafije si motër kryesore kontributin e saj e dha me shumë dinjitet në Dispanzerin e fëmijëve poashtu edhe në QMF “Dardania”.

Gjatë karrierës 45 vjeçare Nafije Qamili shumë herë mori mirënjohje e falënderime të ndryshme si nga stafi i punës, poashtu edhe nga shumë qytetarë Gjilanas.

Nafije Qamili ndoqi shumë trajnime profesionale në Gjilan, Prishtinë si dhe trajnimin dy javor në Dortmuth të Amerikës, poashtu udhëhoqi e ligjëroi në shumë seminare të ndryshme të organizuara.

Nafije Qamili ishte shumë e afërt me gjithë stafin e punës poashtu edhe me pacientë, ajo i këshilloi me mirësjellje e pedantëri. “Ishte një moment emocional të largohesh nga një vend ku ke kontribu një gjysmë shekulli, nuk është e lehtë, do të më mungojnë shoqet, shokët, pacientët e qytetarët, ndihem krenare që tërë dijen time që e pata ja dhurova pacientëve të mi, qytetarëve të Gjilanit e shtetit të Kosovës, gjerë në frymën time të fundit me shumë krenari do t`i kujtojë këto 45 vite që ja fala popullit tim”, ka thënë ish-motra kryesore, Nafije Qamili.

Me rastin e pensionimit kolektivi QMF “Dardania’, në shenjë të falënderimit për kontributin e dhënë kanë organizuar një përshëndetje kolektive duke i uruar Nafijës shëndet të plotë gëzime e suksese në jetë duke theksuar se Nafija do t’ju mungon shumë.

Qyteti i Gjilanit duhet të mburret me Nafije Qamilin e cila plot 45 vite ishte shembull për të mire.

Ndërsa ne, motrës medicinale Nafije Qamilit i urojmë pensionim të këndshëm në gjirin familjarë./rajonipress/

Shpërndaje.
© RAJONIPRESS